Norgga Sámiid Riikkasearvi moaitá garrasit go Norgga sámediggeráđđi biehttala juolludeames ruđaid Joddo-gealboguovddáža ásáheapmái Detnui.
Várrepresideanta Laila Susanne Vars vástida ahte lea váttis juolludit ruđaid nu guhká go váilu ohcamuš.
– Mun goit in leat oaidnán makkárge ohcamuša dien oktavuođas, ja árvalus bođii NSR bušeahttagieđahallama oktavuođas.
Bargan badjel logi jagi
Varsa mielas livččii leat vuogas diehtit masa ruđat mannet ovdal go juolludit ruđaid Joddo gealboguovddáža ásaheapmái.
Bušeahtta meannudeami oktavuođas NSR árvalii 300.000 ruvnnu dán prošektii mainna Deanu gielda lea bargan badjel logi jagi.
Joddo gealboguovddážis galget ovddidit ja dokumenteret luossabivddu ja Deanu sámi kultuvrra.
Gielda ieš bidjan ruđa
NSR sámediggeáirrasTrond Are Antiu šálloša garrasit go Sámedikki eanetlohku biehttala juolludeames ruđaid dása:
– Dát lea dehálaš ásahus min gildii ja sámi servvodahkii. Gielda lea ieš bidjan juo 100 000 ruvnno dasa, ja bovden maid sámedikki searvat, muhto sámediggi ii searvan, dadjá Anti.
Sámedikki várrepresideanta bivdá deatnulaččaid ohcat sis ruđa.
– Lea doarjjastivra sámedikkis mii čohkká ruhtaseahka alde. Ja mii leat dál aitto mearridan sámedikkis ahte árbevirolaš máhttu galgá leat vuoruhuvvon suorgi doarjjastivrras. Trond Are Anti lea várra ieš leamaš maid fárus das, ja mun ávžžuhan sin ohcat vuos doarjaga, dadjá Vars.