Ánndaris Rimpi jođihišgoahtá Sámi Komponisttaid
Ánndaris Rimpi lea julevsámi komponista, jietnadáiddár ja lávlu, Oalloluovttas eret Johkamohki suohkanis. Rimpi lea válljejuvvon jođihišgoahtit Sámi Komponisttaid.
Son komponere musihka dánsunčájáhusaide, teáhteriidda, dáidagiidda, koaraide. Son searvvai maid Sámi Grand Prix gilvvuide dán jagi, ja lea čállán musihka Carte Blanchei, Norgga teáhterii ja lea maid ovddastuvvon Nationálamuseas.
Rimpis leat áigumušat dán ámmáhis:
– Mun háliidan čájehit dan govdodaga, mii min miellahtuid gaskkas lea, dadjá son NRK:i.
– Jietnadáiddárat, populáramusihkkakomponeanttat, musihkkabuvttadeaddjit ja maid klassihkalaš musihkkakomponeanttat ja eksperimentála sámi musihkkárat.