Adveantakaleandar 01.12.2014
Jos vertelin ovtta hája válljet mii gullá juovllaide, de válljelin nellikappelsiinna hája.
Mánnán midjiide lei árgabeaivválaš hommá reidet adveantaappelsiinna, masa bijaimet guokteloginjeallje nelliknávlli. Lei measta dego nuppi guvlui otná skeaŋkakaleandaris, it don maidege ožžon, muhto váldet ovtta nelliknávlli eret appelsiinnas juohke beaivvi. Beaivvis beaivái akta nelliknávli jávkái, ja dalle mon dihten ahte lei akta beaivi unnit juovllaide.
Juste ná mon lávejin dahkat: gávdnen skábes 24 nelliknávlli, appelsiinna ja stuorra nálu mainna muđui láviimet biergoláibesuvlli goarrut. De ráigájin appelsiidnagára doppe gokko galgen nelliika čugget, muhto vertejin ovttilis muitit ahte galggai loahpas leahkit sadji rukses juovlabáddái mas appelsiidna galggai heaŋgut. Nelliknávlliid mon várrugasat deaddilin ráiggiide. Lei oainnát hui dehálaš ahte eai doddjon, go dalle livččii bággu gávdnat ođđa nelliika. Dien áigge olbmot ledje seastileabbo, mii eat galgan biepmuid endorii gurastit.
Nelliknávlliid lávejin juohkit njealji jovkui guđain návlliiguin miehta appelsiinna, ja de čuolmmastin silkebátti buoragit appelsiinna birra. Dat rukses báddi nu čábbát čuovggai oránša appelsiidnagára vuoste. Man fiinnis mu mielas dat lei! Muittán ahte lávejin appelsiinna loktet čalmmiid ovdabeallái, susttašin ja illudin dán buori hájas ja šerres ivnnis mu čáppa, unna dáiddabinnážis. Go dat dát han lea ge go lea válmmas bajás heŋget; čielga dáidda.
Min appelsiidna lávii heaŋgut juobe gievkkanláses dege čuovgalámppus olggumuslobus. Mon buoremusat liikojin go lei lobus, go dálle bessen návddašit nellikhája dakkaviđe go rahpen olgouvssa. Munnje dat lei dego ieš vuordámuša hádja, ja mon máhtten guhka čužžot lobus susttašeamen.
Juovladáhpi appelsiidnahervemiin jávkái go iežálágan kaleandarat bohte. Muhtimin adveanttas mon jurdilan nellikappelsiinna birra. Dat lei sihke álki, hálbi ja ihána čáppat. Soaittán mon dán jagi reidet allasan diekkár nuppeguvllu kaleandara, ja geahččalan dan aktti vel.