Aage Solbakk máhcaha giellaloktenbálkkašumi
Historihkkár Aage Solbakk lea mearridan máhcahit Giellaloktenbálkkašumi, man Gonagas Harald sutnje geigii Snåases golggotmánu 23. beaivve diibmá.
Solbakk lea duhtameahttun dainna go Sámediggeráđđi árvalusastis jagi 2024 bušehttii evttoha Deanu instituhttii seammá olu go dán jahkái, namalassii 532.000 ruvnnu.
– Dát dovdo dego čorbma njeazzái, dadjá Solbakk Ságat áviisii (máksu gáibiduvvo).
Son máhcaha dan 30.000 ruvnnu mii gullá bálkkašupmái, diploma ja 10.000 ruvnnu Snåase-máŧki máŧkegoluid ovddas.
Ráđđelahttu Runar Myrnes Balto (NSR) lohká, ahte lea šállošahtti go Solbakk máhcaha bálkkašumi.
– Diehtit ahte Deanu Instituhtta sávašii eambbo, muhto Sámi servodaga dárbbut leat stuorrát. Mii eat leat nagadan gávdnat lasi ruhtadeami sidjiide, vástida Balto Ságat áviisii.