ČSV – Čájet sámi vuoiŋŋa
Gaskavahku rahppojit Romssas teahterriemut Vårscenefest. Riemut bistet gitta lávvardahkii.
Olgočájálmas «ČSV – Čájet sámi vuoiŋŋa – Vis samisk ånd» čájehuvvo rahpanbeaivve Rådstua teáhterviesu olggobealde.
Johttičájálmas čájehuvvui vuosttaš geardde Berlinas diimmá čavčča.
Camilla Therese Carlsen ja Elisabeth Heilmann Blind leaba ovttas Ulv & Ugle, Sámi Lávdi ja Teater Alo Produksjoner SA ráhkadan ođđa prošeavtta, mas lea vuosttaščájálmas Vårscenefest oktavuođas.
Čájálmas lea performatiivva, čáppat ja bidjá olbmo jurddašit.
Vårscenefest lea lágiduvvon Romssas jahkásaččat jagi 2010 rájes.
Dán jagi leat vel guokte miellagiddevaš sámi buvttadeami. Nubbi lea Elina Waage ja Gerd Mikalsen muitalus «Undersang/Jaskes šuokŋa». Nubbi lea gis Kristina Junttila ArtLab «Walking within the frame – Rávdnjemuotki».