NRK Meny
Normal

– Buorre go gilde vuodjimis

Finnmárkku luonddugáhttenlihtu ovddeš jođiheaddji, Vera Eriksen, oaidná sihkke buriid ja heajos beliid Kárášjoga gieldda bievlavuodjinpolitihkkas.

Barmarkskjøring
Foto: NRK

Luonddugáhttenberošteaddji moaitá Kárášjoga sierralohpelávdegotti seammás go liiko lávdegotti mearrádussii.

Kárášjoga gielda ii šat mieđit sierra bievlavuodjinlobiid olggobeale ealgabivdiide, dušše báikkálaš ealgabivdiide. Eriksen lea ovttaoaivilis Finmárkku fylkkamánniin, guhte gohčoda gieldda sierralohpelávdegotti mearrádusa vealaheapmin ja láhkarihkkumin.

– Su mielas lei buorre go hilgot bievlavuodjinlohpeohcamušaid, muhto ágga ii lean áibbas buorre. Su mielas lea goitge heittot go lávdegoddi ii čujut sierralohpeláhkii.

– Daninhan logaige fylkkamánni, ahte ohcamušaid ii sáhte sierra láhkai meannudit, Eriksen dadjá.

GULDAL: – Ovttaoaivilis fylkkamánniin

Finnmárkku luonddugáhttenlihtu ovddeš jođiheaddji Vera Eriksen lea goitge duhtavaš lávdegotti mearrádussii.

– Kárášjogas lea arván máŋga vahku ja eana lea hirbmat dimis. Su mielas lea hui buorre, ahte eai beasa vuodjit njealjejuvllagiiguin meahccis, Eriksen lohká.