– Mii fertet hupmat iešsorbmema birra
Sámediggi lágidii odne seminára iešsorbmema birra. Áigumuš lea čalmmustahttit váttisvuođa ja ohcat čovdosiid movt eastadit váttisvuođa.
Simon Issát Marainen massii logi dassái goappaš vieljaid iešsorbmemii, lei dušše logi mánu gaska dáhpáhusain.
– Mii fertet ságastit iešsorbmema birra, vaikko lea váttis ášši.
Son válljii álggu rájes juo leat rabas dáhpáhusaid birra.
– Mun vázzen dáluid mielde min smávva gilážin. Mun ovtta ládje bággejin iežan hupmat ášši birra. Maŋŋel leat olbmot dadjan munnje ahte dan geažil duste sii boahtit min lusa, mu váhnemiid lusa, hupmat ášši birra.
Su sáhkavuorru njuorrasáhtti máŋga politihkkara Sámedikkis ja oaččui olu rámi politihkkáriin iežas rabasvuođa ovddas.
– Mii fertet rievdadit iežamet kultuvrra nu ahte ferte leat lohpi dadjat ahte mus ii leat nu buorre dilli dál, dadjá Norgga Sámi Riikasearvvi (NSR) politihkkár Sara Katrine Aleksandersen.
Simon Issát muitalii Buorre eahketbeaivi, Sápmi sáddagis mo lei massit guokte vielja iešsorbmemii. Gula olles jearahallama dás.