– Lihkus ii leat FeFo mii čállá Kárášjoga historjjá
Kárášjoga sátnejođiheaddji, Svein Atle Somby (Bb), lohká iežas imaštit dan maid Finnmárkoopmodaga (FeFo) advokáhtat buktet ovdan Alimusrievttis Kárášjoh-ášši gieđahaladettiin.
– Dikki golbma vuosttaš beaivvi leat FeFo-beaivvit. Dalle FeFo narratiivvat ja historjját muitaluvvojit. Ferten lohkat, ahte lihkus eai leat FeFo-advokáhtat dahje FeFo geat čállet Kárášjoga historjjá, lohká Somby.
FeFo advokáhta Frode Andersen Innjord lea odne muitalan FeFo beali Kárášjoga historjjás. Su čuoččuhus lea, ahte sápmelaččat eai lean dat vuosttaš ássit Kárášjogas.
– Kveanat dat ásse Kárášjogas jagis 1751. Sápmelaččat maid ásse guovllus. Sii ledje badjeolbmot, muhto eai ássan Kárášjogas, čilgii Innjord.
Jagis 1751 gessui rádjá Ruoŧa ja Norgga gaskii sámi ássanguovlluin.
– Historjá ferte muitaluvvot nu mo historjá lea. Dán guokte beaivve ii leat mu oaivái šiehttan dat historjá maid FeFo-advokáhtat muitalit, lohká Somby ja himáhallá.
Somby rámida seammás Alimusrievtti duopmáriid go leat nu aktiivvalaččat ja jerret buriid gažaldagaid.
– Danne han sii leatge Alimusrievtti duopmárat go sis lea nana čehppodat dáin áššiin, rámida Somby.
Les på norsk