– Mu mihttu lea vuoitit, ii mihkke eará. Mun in beroš silbbas. Mun áiggun vuoitit.
Guovdageaidnulaš Ole Johnny Eriksen lea guhká hárjehallan seaguhuvvon doarrun- čehppodaga. Dan nu gohččoduvvon Mixed Martial Arts (MMA).
Dál son ovddasta Norgga riikkajoavkku riikkaidgaskasaš MMA lihtu IMMAF-lágideamis Las Vegasis, Amerihkás.
– Mun áiggun dušše doarrut, vuoitit ja vuolgit ruoktot. Deaivat iežan olbmáid ja bearraša, geaid in leat oaidnán viđa mánnui, dadjá son.
- Loga maid:
-
Geahppudeame
Odne iđđes diibmu beal gávccis lei Eriksen viehkame Las Vegasis. Su duohken gullojit biilla- ja togajienat.
Son dettii 75 kilo go álggii geahppudit. Son galgá geahppudit gitta 65,8 kiloi ovdalgo beassá gilvvohallat dan luohkás.
– Mun in leat duostan vihkket iežan, muhto mun jáhkán mun deattán dál sullii 68 kilo, dadjá son.
Vuostálasti eahpečielggas
Eriksen ii dieđe vuos guđe dain 53 riikka vuostá Norga galgá gilvvohallat. Son galgá odne čoahkkimii mas oažžu dán dieđu.
– Mun in beroš gean vuostá galggan gilvvohallat, dadjá Eriksen.
Sámi MMA-gilvvohalli muitala ahte gilvvohallan lea cup-vuogi mielde hábmejuvvon. Jus vuoitá, de beassá viidásit, muhto jus vuoittáhallá, de ii šat beasa gilvvohallat. Son beassá eanemusat vihtta vuostálasti vuostá doarrut.
Seammás máilmmi stuorámus MMA-lihttu UFC lágida UFC riikkaidgaskasaš vahku. Das deaivvadeaba earet eará Jones ja Cormier nuppe háve, UFC 200 nammasaš lágideamis.
– Mun in beroš dan geahččat. Mun lean dolkan ja háliidan dušše vuoitit ja vuolgit ruoktot, dadjá Eriksen.