Norgga ráđđehus ja Bargiidbellodat vuostálastet addimis Sámediggái iešheanálaš sajádaga davviriikkalaš sámekonvenšuvnna šiehtadallamiin. Dát lea heahpat Norgga Sámiid Riikkasearvvi (NSR) doaibmi jođiheaddji mielas.
– Norgga ráđđehushan lei juo almmuhan mo dán áššis galggašii šiehtadallat. Dál dát seamma ráđđehus hilgu daid eavttuid maid ieš lei bidjan, Gunn Britt Retter lohká.
GULDAL:
Norgga Sámiid Riikkasearvvi (NSR) doaibmi jođiheaddji, Gunn Britt Retter, doarju ollásit sámediggepresideantta Egil Olli go lohpida Sámediggi áigut soahtat bátnegáskiid dan ovdii, ahte Sámediggi galgá oažžut iešheanálaš sajádaga davviriikkalaš sámekonvenšuvnna šiehtadallamiin.
Bargiidbellodaga parlameantaralaš jođiheaddji ja nubbinjođiheaddji, Helga Pedersen, oaivvilda Olli mearehuddat, ja čuoččuha bellodatustiba beroštit eambbo formalitehtain go daid stuorra politihkalaš linjjáin.
Pedersena mielas lea dehálaš, ahte Norgga stáhta hállá ovttain njuokčamiin go Norga, Suopma ja Ruoŧŧa čohkkedit šiehtadallanbeavdái.
Iige Sámediggi galgga sáhttit buktit makkárge protokollalasáhusaid, jus ii leat ovttaoaivilis šiehtadallanbohtosiiguin.
NSR oaivvilda, ahte Bargiidbellodat dáinna cealkámušain duođašta dan maid Olli čuoččuha, namalassii ahte Sámediggi lea bálkestuvvon feaskárii šiehtadallamiin.
Retter lohká Bargiidbellodaga dáinna lágiin čájehit iežas duohta amadáju.
– Dat ii oro háliideamen ovddidit sámepolitihkká Norggas ja dohkkehit sámiid vuoigatvuođaid, Retter dadjá.