Norgga Boazo-sápmelaččaid Riikasearvvi (NBR) stivra cuiggoda dutkanásahusa NINA go eai leat vuđolaččat gulahallan boazodoaluin ođđa boazodoallorapportta ráhkadettiin.
NINA dutkit leat guorahallan manne boazodoallit masset bohccuid,
ja lohket boađusin leat ahte bohccot dávjjibut jápmet nealggi geažil eaige boraspiriid geažil.
Boazodoallit geain lea leamaš dahkamuš dutkiin
láitet dutkiid gulahallama ealáhusain, lohká NBR njunuš, Nils Henrik Sara.
Heajos ealáhat lea stuorát áittan bohccuide
NINA dutkanásahus lea Birasgáhttendepartemeantta ja Eanandoallodepartemeantta ovddas guorahallan sivaid dasa go boazodoallit masset bohccuid.
Maŋimuš jagiid leat leamaš olu digaštallamat borasbiirevahágiid birra ja olu boazodoallit oaivvildit boraspiriid leat stuorámus sivvan dasa go boazodoallit masset bohccuid. NINA dutkanrapporttas lea ges eará konklušuvnna.
Dutkit lohket heajos ealáha ja nealggi leat stuorát áittan bohccuide go boraspiret.
Norgga Boazosápmelaččaid Riikasearvi (NBR) stivra lea čoahkkinastán máŋga beaivvi, go rapporta lea suhttadan ollugiid.
Sara lohká iežaset maid ain guorahallamin rapportta ja lasiha ahte mii guoská etihkalaš oassái dán bárggus de imaštit sii manne dutkit maid nugo mattasámi guovllus heivehit geasset ovdan alimus boazologu čilgehussan dasa go bohccot jápmet.
Imašta NBR stivrra moaitagiid
NINA dutkan ásahusa dutki, Torkild Tveraa imašta NBR stivrra moaitagiid
váilevaš gulahallama dáfus.
Sii han leat čađa gaskka geahččalan doallat buot orohagain
lagaš oktavuođa dán dutkan-barggu oktavuođas, lohká Tveraa.
Sii leat maid juo jahkebeale dassái go rapporta gárvánišgođii doallan čoahkkimiid boazodolliin geat leat leamaš mielde dutkanprošeavttas
– ja dalle han sii juo čilgejedje boazodolliide bohtosiid ja makkár ođđa dieđuid dán dutkama olis leat ožžon lohká Tveraa.
Eai dalle gal lean geat ge suhttan ja eddon sidjiide, deattuha son.
Ii leat politihkalaš mihttomearri sin beales
Sii leat dutkamis maid geavahan almmolaš loguid mat leat olu jagiid juo čohkkejuvvon , nugo bohcco deaddu , orohagaid boazologut, boraspiredutkamat ja nu ain.
Go lea sáhka dutkat dan makkár vuoimmis bohccot leat ja manne boazodoallit masset bohccuid, de lea goit dutkiid mielas lunddolaš dán oktavuođas árvvoštallat bohtosiid maiddái orohagaid boazologu ektui
– Dákkár dutkanvugiin ii leat makkár ge politihkalaš mihttomearri sin beales , deattuha Tveraa.