Maŋŋálgo Norgga sámiid Riikasearvvi Trond Are Anti Samedikki dievascoahkkimis celkii, ahte juoigangielddus sihkkojuvvo girkkus, de lea digastallan buollan.
Guovdageainnu searvegotteradi ovdaolmmos Lars Juhani Vasara lea aibbas vuostá juoigamii girkus.
- Juoigan gal ii heive girkui, ii Guovdageainnus, iige earáge sajiin, dat manná njuolga vuostá ipmilsáni oahpu ja de ii heive oktii, lohká Vasara.
- Sálbma ii buoret luođi
Romssa suohkanbahppa Kjell Skog ii oainne salmma buorebun go luohti.
- Dal lea áigi, ahte sámi searvegottit guorahallet iežaset doimmaid. Jus dan oidnet, ahte lea eanet risttalaš badjelgeahččat sámi juoigama dan váste, go lávlut sálmmaid mat leat 1400-logu juhkanmelodiiaide dahkkon, de eai ipmir gal beare ollu, dadjá Romssa suohkanbáhppa Kjell Skog.
Buorre ákkát guktui beliin
Sámi girkorádi ovdaolmmoš Tore Johnsen ipmirda goappaš beliid, muhto ii oainne juoigama valdoaššin das.
- Son gal ádde guktuid beliid dán áššiš, ja gávdnujit buorit ákkát goabbásge. Dás lea iešalddis sáhká stuorát áššiš go ieš juoigan, namalassii makkár árvu galgá leat sámi kultuvrras sin osku- ja girkoeallimis.
- Jos livčče čielga luohti mii gutnijahttá ipmila, de livččiigo dat heivvolut, go luohti mii sieiddi birra lea?
- Jos smiehttá hui oktagerdánit, de nie sáhtášii várrá lohkat, vástiđa Johnsen.
GULDAL: