Guovdageainnu johttisámiid searvvi stivrralahttu, Nils Mikkelsen Sara, árvalii Guovdageainnu Johttisámiid searvvi jahkečoahkkimis, ahte boazodoallošiehtadussii galggašii biddjot sierra ruhta, vai badjenissonat, geat leat fásta bargguin, oaččošedje mánu virgelobi bálkkáin boazobargguide.
Boazodoallostivrralahttu, Berit Marie Eira, doarju dán árvalusa. Son muitala iežas árvalan sullásaš ortnega juo guokte jagi áigi, muhto ii dallege dorjon Guovdageainnu johttisámi searvi dán ortnega.
GULDAL:
Guovdageainnu johttisámiid searvi ii dorjon dánge vuoro dán evttohusa. Muhtumiid mielas ii leat vuogas, ahte dat nissonolbmot, geat barget birrajagi bohccuiguin, eai oaččo oppanassiige bálkká.
Nils Mikkelsen Sara evttohus ii leat vel formálalaččat ovddiduvvon Norgga Boazosápmelaččaid Riikasearvái. NBR stivrras leat mielas digáštallat dán árvalusas, muitala NBR:a stivrralahttu, Per John Anti, váikko son gal mielas vuoruhivčče nuoraid dili boazodoalus.