NRK Meny
Normal

Soabatmeahttunvuohta čuohcá lullisámegillii

- Lea stuorra áittan lullisámegillii jus sii dál masset oahpaheddjiid dušše ruđalaš soabatmeahttunvuođaid dihte, lohká Gaska-Norgga sámeskuvlla váhnenráđi jođiheaddji, maŋŋelgo guovttis áitiba heaitit.

Fjernundervisningsrom
Foto: Kallestad, Gorm / SCANPIX

Sis ii leat ráđđi massit eambbo lulli-sámegielat oahpaheddjiid, lohká Gaska-Norgga váhnenráđi jođiheaddji Charlotta Berglund, dasa go guokte oahpaheaddji áitiba heaitit ruđalaš soabatmeahttunvuođaid dihte.

Sis leat nu unnán oahpaheaddjit dál ahte ferte njulgestaga ávžžuhit eambbogiid váldit oahpaheaddjeoahpu jus sin giella galggaš seailut.

GULDAL: LULLI SÁMEGIELLA SÁHTTÁ JÁVKAT

Guokte lulli-sámegielat oahpaheaddji dat leabage dál áitán heaitit fállat gáiddusoahpahusa Gaska-Norgga sámeskuvlla ohppiide jus skuvla ii máksigoađeš rusttetláiggu ja jus ieža šaddaba oahpaheaddjebálkkáiguin máksigoahtit goluid mat leat go fállaba gáiddusoahpahusa mánáide.

62 máná

Dál leat Gaska-Norggas 62 máná geat ožžot sámegieloahpahusa, 31 dáin ohppiin ožžot gáiddusoahpahusa.

Dát guokte oahpaheaddji fállaba oktiibuot moattigoalmmatlohkái mánnái gáiddusoahpahusa.

Gaska-Norgga sámeskuvlla njunnošat eai leat mieđihan máksit eambbo sutnuide, skuvla mii lea dan golmma deháleamos lulli sámi oahpahusásahusain.

Charlotta Berglund ii hálidivčče seaguhit justte dán oktasaš áššái, muhto ballá stuorra váikkuhusaid jus eambbogat heitet fállamis oahpu.

Čuohcá buohkaide servodagas

Sii váhnemat gal hálidit ahte mánát ožžot dan oahpahusa masa lea vuoigatvuohta ja giella galggašii sis maid nanusnuvvat. Dál lullisámegiela eai huma šatgo muhtun čuođi olbmo Norggas.

Oahpaheaddjeguovttos geat áitiba heaitit, dárbbašeaba skuvllas veahki máksit earret eará govdafierpmádaga- ja IP adreassa goluid. Ja láiggu vel rusttegiid ovddas maid ieža leaba šaddan oastit.

Sami Radio ii leat vel ožžon vástádusa sámeskuvlla rektoris maid dahket oahpaheaddji guovtto gáibádusain, muhto nubbi oahpaheaddjis, Kirsten Appfjell Eira, duođašta Sámi Radioi ahte eaba leat vel gullan maidege skuvllas.