Lærarar slit med å setje karakter – her møtte 8 av 24 elevar til timen

Mange russ og avgangselevar møter ikkje opp på skulen lenger. I det siste har det blitt eit problem over heile landet – særleg der russemiljøet er stort.

Lærarar slit dimed med å få sett karakter på mange av elevane.

Ein av dei som manglar vurderingsgrunnlag for nokre elevar er Bjørn Eirik Orstad.

Han er lærar for ein avgangsklasse på Randaberg vidaregåande skule i Rogaland.

Då timen hans tok til måndag morgon var 8 av 24 elevar til stades. Etter kvart kom fire-fem til.

Utdanningsforbundet og vidaregåande skular NRK har prata med over heile landet bekreftar det same – elevar i tredje klasse har generelt sett eit betydeleg større fråvær i år enn tidlegare.

Nokre lærarar syner frustrasjon på sosiale media:

Manglar grunnlag for vurdering

I og med at elevane ikkje skal ha eksamen i år, er det prestasjonane i timane som skal bestemme kva karakter dei får på vitnemålet.

Samstundes har fråværsregelen vorte lempa på – ein må ikkje dokumentere sjukefråvær med nokon legeattest, og sjukefråvær vert fjerna frå vitnemålet.

Elevar og tilsette ved skular NRK har prata med peikar på dette som viktige grunnar til at mange som er russ ikkje møter opp i klasserommet.

Og utan oppmøte i timane har lærarar rett og slett ikkje nokon måte å bestemme karakteren til elevane på.

– Det vert ein del meirarbeid utav det. Skal eg planlegge for at der kjem ti elevar eller tjue elevar? Det øydelegg litt flyten i min arbeidskvardag, seier Orstad.

– Ekstremt mange får «ikkje vurdert»

– Vi har jo hatt eit lite problem på skulen med at folk går glipp av vurderingar, seier Melisa Elshani.

Ho er ein av dei som møtte til første time i programfag psykologi måndag morgon på Randaberg VGS.

– Då endar det jo med at ekstremt mange får «ikkje vurdert». Det er jo litt skummelt, for då må dei jo ta opp fag, so det vert vanskelegare i lengda, seier Elshani.

– Hensikta var ikkje å leggje til rette for ei utvida russefeiring

Utdanningsforbundet, som den største fagorganisasjonen i utdanningssystemet, støtta i haust å mellombels oppheve fråværsgrensa.

Tormod Korpås er sentralstyremedlem i forbundet og leiar det sentrale leiarrådet – han har altso mykje kontakt med rektorar rundt om i landet.

Han seier hensikta med å utsetje gjeninnføringa av fråværsgrensa var å gje elevar som har gått gjennom vidaregåande skule i pandemien høve til å få mest ut av opplæringa.

– Hensikta var ikkje å leggje til rette for ei utvida russefeiring, seier Korpås.

Han seier han forstår at elevane har hatt vanskelege skuleår, men at nokre av dei truleg har mistolka nokre signal og teke seg meir fri enn dei burde.

– Men nettopp difor tenkjer vi at det kan sjå ut som det at vi ikkje gjenninførte fråværsgrensa har slått attende, seier Korpås.

Ikkje ein konsekvens av mangel på trugslar

Edvard Botterli Udnæs er leiar for Elevorganisasjonen.

Han seier dei får mange førespurnader frå elevar om vurderingar, so han veit at mange framleis jobbar hardt og er opptekne av skulen.

Udnæs meiner at mengda heimeskule og raudt og gult nivå har svekka ungdomane si tilknyting til skulen.

– Der det faglege tilbodet var svekka under heimeskuleperiodane, var det sosiale tilbodet heilt borte. Det er utruleg essensielt for at elevane møter opp: at dei kjenner seg trygge på medelevane og lærarane, seier Udnæs.

– Vi ser ikkje på dette som ein konsekvens av at dei ikkje har nokre trugslar for å ikkje møte opp. Vi ser på dette som ein konsekvens av ein skule som har hatt problem med å jobbe mot eit godt skulemiljø dei siste to åra. Det er ikkje nokon kritikk mot skulane, det er berre slik situasjonen har vore, seier han.

Ei tung tid

Lærar og tillitsvald ved Amalie Skram vgs. i Bergen, Lill kalleklev Almås, fortel om periodevise halvtomme klasserom òg i Bergen.

– Det er ein del elevar som står i fare for å ikkje få standpunkt vil eg tru, og det er litt skummelt viss dei tenkjer dei skal få det etter russetida, for det kan jo bli streik.

Rektor Lars Berntsen er bekymra for tilbakemeldingane dei får frå lærarane om høgt fråvær.

– Bekymringa vår går både på at vi ønskjer at elevane skal fullføra og få vitnemål med karakterar i alle fag. Vi er òg bekymra for den psykiske helsa til dette kullet. Vi ser at det er mange som har hatt ei tung tid gjennom pandemien.