Sjå kattens reaksjon når dynamitten går av

– Det er ganske heftig. Du får ikkje noko varsling, og vaknar fort, seier Tore Haaland.

Huset hans står 18 meter over der dynamittsalvene går av i Eiganestunnelen i Stavanger. Frå tidleg om morgonen til seint på kvelden sprenger vegvesenet seg mot Ryfylke.

– Når dei sprenger utandørs, så høyrer ein jo varslingslyden, men her høyrer me ikkje den. Klokka 7 om morgonen kan salva gå av. Då får du ein heftig start på dagen, for å seia det slik, seier han.

• LES OGSÅ: – Denne steinen kom deisende inn her
• LES OGSÅ: – Ryfast-arbeidet skremmer kråkene

– Eg hadde lyst å skjella ut nokon

Sprengingsarbeidet i Ryfast- og Eiganestunnelane er godt i gang, og frå området ved motorvegen i Stavanger strekk tunnelane seg no 300 og 500 meter inn under husa på Våland.

– I går sprengde dei rundt klokka 23 på kvelden. Eg slappa av og såg på TV, så då skvatt eg skikkeleg. Eg vart forbanna, og hadde lyst å ringa nokon for å skjella dei ut, seier Tore Haaland.

• LES OGSÅ: Vurderer sivil ulydighet for å stanse anleggsmaskinene
• LES OGSÅ: – Eit lykketreff at ingen blei skadd

«Ta litt omsyn og gi folk litt fred»

Karstein Sandvik, HMS-ansvarleg for entreprenørane, seier at det er fleire som har gjort ord av handling, og sendt svar til ei SMS-teneste dei tilbyr for å varsla sprengingane.

– Klokka 21.42 onsdag: «No må de ta fri snart!» og 22.57 torsdag: «Djesus! Ta no litt omsyn på nettene! Håpar dette er siste på nettene! Ta litt omsyn og gi folk litt fred», les Sandvik frå telefonen sin.

– Sprengingane er forsvarlege, men kan nok opplevast ubehagelege. Me skal prøva å sprengja oss hurtig forbi. Me tek fire meter og 70 centimeter på kvar salve, så me håpar at me kan forlata området og ikkje belasta folk alt for mykje, seier Sandvik.

– Som å bu i tunnelen

Svenske Emil Carlsson bur i kjellarleilegheita til Tore, og kjenner arbeidet endå betre på kroppen.

– Det kjenner ut som om me skal hamna ned i tunnelen. Det bråkar ganske mykje, seier Carlsson.

• LES OGSÅ: Hevder hunden døde på grunn av Ryfast-støy
• LES OGSÅ: – Ryfast-utbygginga burde vært bedre planlagt

(Målingar etterpå viste at denne sprenginga berre var 14 prosent av maks tillatne rystelsar. Kvelden før gjekk det ei salve som var 85 prosent av maksverdien.)

Inviterer folk inn i tunnelen

På søndag har entreprenørane JV Bilfinger og Stangeland, i samarbeid med Statens vegvesen, invitert til open dag for publikum som ønskjer å sjå korleis det ser ut nede i Eiganestunnelen.

– Folk kan koma inn i tunnelen. Det blir guide frå Statens vegvesen og ein finsk anleggsleiar som skal forklara litt om tunnelbygging, seier Karstein Sandvik, HMS-ansvarleg for entreprenørane.