Det var forhandlarane frå nettopp Rogaland som sa nei til nynorsk som administrasjonsspråk i den nye vestlandsregionen. Det førte til kraftige reaksjonar frå mållaga både i Sogn og Fjordane og i Hordaland, den dagen avtalen var klar.
– Vi i Hordaland Mållag er steik forbanna. Administrasjonsspråket er sjølvsagt nynorsk både i Hordaland og i Sogn og Fjordane, og burde ha vore det i Rogaland også. Dette skal me slåst imot, sa Astrid Olsen, leiar i Hordaland Mållag.
- Les også:
Nå kjem Rogaland Mållag
To veker har gått, og nå kjem Magne Viggo Høyland, leiar i Rogaland Mållag på banen.
– Ja det kan godt vera at det er i seinaste laget. Men det er ennå ei stund til det skal gjerast vedtak i fylkestinget. Me har ennå ein månad å jobba på, seier han.
– Kvifor har det gått så lang tid, då? Er det me som ikkje stiller spørsmål, eller kva er det?
– Ja det kan det også vera. Me skulle kanskje vore litt ... Men nå skal me vera med og gjera eit vedtak, som kanskje kan retta dette opp, seier Høyland.
- Les også:
I Rogaland snakkar dei fleste bokmål
Det var i innspurten av forhandlingane at delegasjonen frå Rogaland sa nei til at nynorsk skulle vera hovudspråk i ein eventuell ny vestlandsregion.
Fylkesvaraordførar Marianne Chesak frå Rogaland, sa det slik:
– Vår felles identitet ligg ikkje i nynorsken, for me brukar bokmål. Dei fleste i Rogaland har sin identitet i bokmål.
Bokmålsforbundet støttar Rogaland
Steinar Øksengård er formann i Bokmålsforbundet. Han har sendt statistikk til alle dei tre fylkestinga på Vestlandet som er med i den nye regionen. Der peikar han på at stadig færre brukar nynorsk både i grunnskule og i vidaregåande.
– Det er eit stort bokmålsfleirtal også i den nye vestlandsregionen, og då ville det ha vore svært udemokratisk dersom det blir nynorsk i området, seier han.
Legg strategi i dag
Klokka 17.00, torsdag 29. september, skal Rogaland Mållag ha markering på Arneageren i Stavanger sentrum. Etterpå skal dei ha møte på Thon Maritim hotell.
- Les også:
Då kjem også leiaren for Noregs Mållag på besøk og det møtet skal munne ut i ein uttale til støtte for at nynorsk skal vera hovudspråk i den nye vestlandsregionen, lovar leiar i Rogaland Mållag, Magne Viggo Høyland.
– Me må sørga for at det blir ein nynorskregion. Det er vår jobb framover i saman med Noregs Mållag, seier han.
Høyland slår også fast at nynorsk er like naturleg for dialekten i Rogaland som lengre nordover på Vestlandet.
– Tore Renberg sa det nokså greitt då han sa at dialekten i Stavanger ikkje er så langt frå nynorsken, men at dei som bur i byen ikkje vil innrømma det.