Språkstrid kan velte heile vestlandsfylket

Fylkesordførarar frå Sogn og Fjordane, Rogaland og Hordaland stråla om kapp då dei i førre veke orienterte pressa om semja rundt ein intensjonsavtale for vestlandsfylket.

Det som sette sinna i kok her i fylket, er dei same partane sin intensjon om eit nøytralt administrasjonsspråk.

– I sin verste konsekvens kan det torpedere vidare diskusjon innanfor vestlandsregionen, seier Fredrik Mehn-Andersen, formann i Bergens Riksmålsforening.

Nynorsk tyngdepunkt

Ivar Aasen-tunet la i dag fram språkstatistikk om den nye Vestlandsregionen. Der kjem det mellom anna fram at Hordaland er tyngdepunktet innan nynorsk. Og det er nettopp nynorsk folk på gata fjordfylket vil ha som hovudmål i vestlandsregionen.

Rakel Apneseth trur ikkje nynorsken vil døy ut, men fryktar den blir vanskelegare å halde på om det ikkje er i administrasjonsledda.

• Les også: Møre og Romsdal er for splitta til å halde fram åleine

– Eg håpar dei ombestemmer seg, noko eg trur er mogleg. Eg er ikkje overtydd om at Rogaland blir med, og kanskje vi heller får med halve Møre og Romsdal? Då er det naturleg at nynorsk blir språket, seier ho.

Fryktar for nynorsken

– Det blir jo utvaska uansett, så språket blir uansett hummar og kanari til slutt, meiner ein annan NRK møter på gata i Førde.

Brita Grønli flytta frå Nord-Norge til nynorskbyen for tre år sidan og har etter kvart funne ut at det er nynorsken som skulle ha vore hennar følgjesvein frå barnsbein av.

– Det går nesten ikkje an å tru at det skal skje. Ein må bevare nynorsken som eit hjartespråk, seier ho og fryktar at nynorsken kan stå i fare dersom det ikkje blir hovudmålet i ein ny region.

Fleirtalet bur i byar

Den meinige mann i gata får støtte også frå politisk hald. SV-nestleiar Oddny Miljeteig skildrar avtalen som den største kulturpolitiske skandalen nokosinne. Hovudmålet er eitt av mange stridsspørsmål undervegs.

Mehn-Andersen likar dårleg protestane frå vestlandsnaboen i nord og meiner det er eit demokratisk problem at eit mindretal skal styre kva målform som skal dominere.

– For vår landsdel er det eit fleirtal av kommunane som har valt nynorsk som sin målform. Bergen har erklært seg språknøytral, slik som andre byar i landet. Likevel er det eit klart fleirtal av bokmålsbrukarar i Hordaland, seier han.

Politikarane må avgjere

Ved Nynorsk kultursentrum i Ørsta meiner Ottar Grepstad at temaet er eit språkpolitisk spørsmål som politikarane må ta stilling til.

Han er oppgitt over argumentasjonen til Mehn-Andersen.

– Så har riksmålsforbundet aldri vore for noko som kan halde oppe eller styrke bruken av nynorsken. Vestlandet er ein svært viktig del av den språklege jamstillinga i Norge og det er den einaste landsdelen der nynorsk er dominerande språk i store delar, seier han.