Dette blei krisemillionane brukt til

På Aspervika skole i Sandnes er fleire handverkarar i sving med å skifta taket på skulen.

Takjobben er eitt av fleire oppdrag byggmeisterfirmaet Byggmester Sagen har fått takka vere tiltakspakke-pengane frå staten i fjor. Pengar som har fått fart på fleire «spadeklare» prosjekt i Rogaland.

• SJÅ LISTE FOR ALLE KOMMUNAR NEDST I ARTIKKELEN

– Me såg at det blei meir fart i kommunane då pengane frå staten kom. Det kom fleire førespurnader og me var heldige som fekk ein del av dei jobbane, fortel dagleg leiar hos Byggmester Sagen, Snorre Hallem.

Nav: – Auka aktivitet

64 kommunar på Sør-Vestlandet fekk til saman 400 millionar kroner i ei ekstraordinær tiltakspakke frå staten i 2016. Rogaland stakk av med over halvparten, nesten 220 millionar.

Målet var ganske enkelt å få fleire i jobb i ein region med høg arbeidsløyse. NRK har spurt kva pengane gjekk til i alle dei 15 kommunane i Rogaland som fekk pengar (sjå liste nedst i artikkelen).

Opprusting av vegar/turvegar og vedlikehald av skular og barnehagar er noko som går igjen i svara til kommunane. Og fleire kommunar melder at dei har brukt lokale handverkarar og entreprenørar.

– Me ser at arbeidsløysa har gått ned i bygg- og anleggsbransjen. I tillegg har det vore ei kraftig auke i utlyste stillingar i bygg- og anleggsbransjen. Det tilseier auka aktivitet i denne bransjen, seier assisterande fylkesdirektør i NAV Rogaland, Anneline Teigen.

• LES OGSÅ: Tiltakspakkane har effekt i byggebransjen
• LES OGSÅ: Nå får olja millioner til omstilling

Ordførar: – Ikkje allverdas effekt

Men trass krisepengar frå staten, arbeidsløysa har stabilisert seg på eit høgt nivå i Rogaland, høgast i landet. Då skal dei meir til enn tiltakspakkar, påpeikar Nav-toppen i Rogaland.

– Pakkane kan ha ein dempande effekt på arbeidsløysa. Den dempande effekten på kort sikt, kan ha hindra at arbeidsløysa har forplanta seg vidare. Samtidig tenker me at regionen sine omstillingsutfordringar er betydeleg større enn at dei lar seg løysa ved tiltakspakkar.

Rennesøy var blant kommunane som fekk minst i tiltakspakka i fjor, knappe 600.000 kroner. Pengane har gitt lokale bedrifter meir jobb, og har hatt ein sysselsettingseffekt meiner ordførar Dagny Sunnanå Hausken (Sp).

– Eg er ikkje i tvil om det. Men det er nokre hundre tusen me har fått, og det blir ikkje allverdas effekt av det.

– Pakkane hindra permitteringar

Haugesund fekk drygt 24 millionar kroner i tiltakspakka i fjor, og var blant kommune i Rogaland som fekk mest. Men tiltaket har berre hatt avgrensa sysselsettingseffekt, meiner ordførar Arne-Christian Mohn (Ap).

– Dette er prosjekt som varer over nokre månader. Eg snakka med ein som skulle permitterast, men som fekk jobb. Men det var jo berre jobb i tre månader, slik at det blir ein veldig avgrensa effekt.

Men Snorre Hallem i Byggmester Sagen er ikkje i tvil; jobbane dei fekk i fjor som følgje av tiltakspakka var heilt avgjerande for at alle i hans stab kunne ha jobb.

– Dette hadde vore ein endå tøffare marknad utan tiltakspakkane og det ville fått konsekvensar. Eg trur pengane har hindra permitteringar og oppseiingar i bransjen.

Kommunane må rapportera til Fylkesmannen kva pengane har gått til. Truleg blir fristen sett til 1. mars.

• OVERSIKT BRUK AV TILTAKSPAKKE-PENGAR I 2016 (ikkje alle prosjekt er fullførte):