Stavanger vil gi 20 menneske med utviklingshemming jobb i kommunen.
Dei har inngått eit samarbeid med Helt med. Det var gjennom denne stiftinga Adam Berge fekk jobb i 2020.
– Det gjer noko med sjølvkjensla når du jobbar og tener dine eigne pengar, seier han.
Heilt med inkluderer personar med utviklingshemming og lærevanskar i det ordinære arbeidslivet.
Berge jobbar som vaktmeister på Eiganes skole i Stavanger. I tillegg er han frivillig i Helt med.
Han har sjølv ei lettare funksjonsnedsetting.
– Det er mange med funksjonsnedsettingar som ikkje har jobb og er heilt på botn. Dette er ein stor dag, seier han.
- Emily med Downs syndrom fekk draumejobben takka vere Heilt med. – Folk som meg treng ein jobb slik at vi får oppfylt draumane våre.
Sissel Knutsen Hegdal: – Alle er velkomne i arbeidslivet
Avtalen om 20 nye arbeidsplassar inneber ti stillingar i kommunen og ti stillingar i private bedrifter som Stavanger kommune vil betale for.
– Det er eit tydeleg signal om at vi ønsker å gjere ein solid innsats for å rekruttere fleire inn i arbeidslivet og ta tak i den store gruppa som vi veit opplever utanforskap, seier ordførar Sissel Knutsen Hegdal (H).
Ho påpeikar at det er stort behov for arbeidskraft og ønsker å sende ut eit signal om at alle er velkomne i arbeidslivet.
– Vi må ikkje berre sjå på dei med mastergrad og perfekt CV. Vi har mange dyktige arbeidssøkarar som vil inn i arbeidslivet, men som ikkje får tilgang.
Dei nye arbeidsplassane kommunen gir, seier ho er eit forsøk på å nå dei og seie at kommunen har bruk for dei.
Det er rundt 50 kommunar som har eit samarbeid med Helt med, og så langt har nesten 290 personar fått fast jobb med deira hjelp.
Kongen felte tårer
Berge har kjempa for at fleire som han sjølv kan komme seg ut i arbeidslivet. For han veit kor mykje det betyr.
Nå har han flytta inn i ei leilegheit for seg sjølv.
Berge fekk lov til å fortelje om Helt med og erfaringane sine til kong Harald i 2022.
– Det var eit så sterkt møte at alle saman felte tårer. Kongen òg, seier Berge.
Han seier kongen var interessert og ville høyre på det han sa.
– Kongen sa at viss det var nokon som klarte å gjere noko med dette, så var det oss.
- Unikt arbeidstilbod i Tana gjer at vaksne med utviklingshemming får jobbe. Julie (21) har fått jobb i butikk.
Heilt med får mange førespurnader frå arbeidsgivarar
Jarle Eknes er dagleg leiar i Helt med. Han seier det er mange i målgruppa som ønsker å komme inn i arbeidslivet, men som ikkje slepp til.
– Vi får mange førespurnader frå arbeidsgivarar som ønsker å vere med. Dei som ønsker jobb kan enten søke på stillingane vi legg ut, eller komme på ein samtale og fortelje om draumane deira og ønsker, seier Eknes.
Han meiner at arbeidsinkludering er eit av dei sterkaste verkemidla for å styrke folk den psykiske helsa si.
– Målet vårt er at dei kan gå direkte frå skole inn i fast jobb. Det er lett å miste trua på seg sjølv og eigne ferdigheiter viss ein ikkje kjem i jobb, seier han.
Tom Tvedt: – Vi må slutte å halde dei på utsida
Tom Tvedt er forbundsleiar i Norsk forbund for utviklingshemmede. Han seier det å få lov til å bidra i fellesskapen, gir ein eigenverdi gjennom å føle at ein bidrar.
– Men også fellesskapen på jobb der ein treffer folk og blir venner betyr ekstremt mykje. Det skulle berre mangle at dei med ei utviklingshemming skal få ta del i arbeidslivet, seier han
Han meiner at det offentlege generelt sett er for dårlege til å legge til rette for arbeid til denne målgruppa.
– Vi må spørje og behandle folk som folk og leite etter arbeidsgleda som finst. Vi må slutte med å halde dei på utsida, seier han.
- Forskarar meiner utviklingshemma kan bidra meir i arbeidslivet. – Dei er ein ubrukt ressurs.