Angrep på taxisjåførar kvar andre månad

Ein 32 år gammal mann gjekk til angrep på drosjesjåføren etter ein tur til Lutsi i Sandnes, tidleg søndag morgon.

Mannen skal ifølge politiet ha slått taxisjåføren i ansiktet fleire gonger. Han skal også ha tatt kvelartak på sjåføren, under sjølve køyreturen.

• Les også: Taxikunde tiltalt for vold mot sjåfør

Sjåføren hadde merke etter slag i ansiktet, då politiet kom til plassen.

32-åringen blei tatt av politiet og sett i arresten, skulda for lekamsskading.

Skjer heile tida

– Heldigvis, om eg kan få bruka eit slikt ord, så var det ikkje ein sjåfør frå Sandnes Taxi det gjekk ut over denne gongen. Det seier Kay Hustoft, som er dagleg leiar i drosjeselskapet.

Men han kan vise til mange slike overgrep på eigne sjåførar berre dei siste månadane.

For ikkje lang tid sidan var det ei kvinne som gjekk til åtak på sjåføren med kniv frå baksetet.

Før det brukte kunden balltre mot sjåføren. I desember i fjor var det to tilfelle av at sjåføren blei trua med handvåpen.

Les også: Politiet vil ha kameraovervåkning i drosjene

– I gjennomsnitt skjer slike hendingar kvar andre månad, og me har berre 140 bilar i vårt drosjeselskap, seier Hustoft.

Får ikkje lov til å bruka kamera

Sandnes Taxi har gåande ein krangel med Datatilsynet om bruk av overvakingskamera i taxibilane sine.

Dei meiner det delvis vil hindre angrep på sjåføren, og dersom det skjer, vil gjere det enklare å oppklare i ettertid.

Les også: Dropper kamera-påbud i stavangerdrosjer

– Men Datatilsynet meiner at det er overvaking av sjåførane og seier nei, fortel ein frustrert dagleg leiar.