Drap på Varaldsøy

Drapsdømt bytar forsvarar

Den 48 år gamle mannen, som av Haugaland og Sunnhordland tingrett vart dømt til fengsel i 15,5 år for drapet på Renate Strand Normann, har no byta forsvarar. Mannen var tidlegare forsvart av advokat Jørgen Riple, men no har advokat John Christian Elden overteke. 48-åringen har heile tida hevda han handla i naudverje, og har anka tingrettsdommen til Gulating lagmannsrett.

Forsvarar: Kjem til å anke

Forsvararen til den 48 år gamle mannen som er dømt til 15,5 års fengsel for drapet på Varaldsøy, Jørgen Riple, seier dei mest sannynleg kjem til å anke. Mannen har ikkje erkjent straffskuld for drapet, og seier dei hadde håpt på rundt seks års fengsel-

Reagerer på sverting av drapsofferet

Bjarte Aarlie, som er bistandsadvokat for familien til avdøde Renate Strand Normann, sa i sin prosedyre at familien reagerer på det tiltalte har sagt i retten. Han har mellom anna sagt at han handla i naudverje, og at offeret var rusa.

– Dei opplever at tiltalte stikker frå ansvaret sitt, sa Aarlie.

Han meinte at retten måtte tilkjenna tre pårørande oppreisingserstatning på til saman 1.050.000 kroner. Også den tidlegare sambuaren til tiltalte har reagert på korleis han står fram i retten.

Aktor ber om forvaring i 16 år: – Eit angrep i avsindig sinne

Benedikte Høgseth, aktor i rettssaka etter drapet på Renate Strand Normann, har lagt ned påstand om at ein 48 år gammal mann må dømmast til forvaring i 16 år, med ei minstetid på ti og eit halvt år. Både for drapet på Normann, men også for vald og truslar mot sin tidlegare sambuar.

Aktor meinte at det ikkje var noko fornuftig grunn til at 48-åringen skulle angripa Normann med ein trestokk og slå ho i hel. Høgseth understreka kor brutalt drapet var.

– Dette minner ikkje om naudverje, men eit angrep i avsindig sinne, sa ho.

Aktor la til at tiltalte hadde prøvd å bortforklara hendinga, og at han også har prøvd å sverta avdøde Normann. Vidare sa aktor at tiltalte hadde få utsikter til å forbetra seg.