Yris Hotell i Olden

I 1893 bygde Yri nytt hotell i sveitsarstil eit stykke ovanfor gamlekyrkja i Olden. Dette vart etterkvart eit av dei største og beste turisthotella i fylket.

Eigde fleire verksemder

Samstundes dreiv Vilhelm Yri landhandel nede ved sjøen, og var medeigar i skyssbåten ”Victoria” på Oldenvatnet. I 1909 kjøpte Vilhelm Yri Storgarden Gjerde på Nordfjordeid og flytta dit. Her tok han i bruk det store herskapshuset på Gjerde som hotell og kalla det Yris Hotell.

I Olden lét han hotellet over til sonen Sivert W. Yri (1880–1926). Handelen og posthuset i Sjøatunet tok sonen Rasmus Yri (1883–1958) seg av.

Yris Hotell før brannen i 1977

Singer budde på Yri

Då den amerikanske mangemillionæren William Henry Singer jr. flytta til Olden i 1913, budde han nokre år på Yris Hotell før han bygde sin eigen villa Dalheim i 1921. Singer fekk bygd eit eige, private tilbygg til hotellet, der han budde i dei første Olden-åra. Singer vart ein nær ven av Sivert og Rasmus Yri, og Rasmus vart ein sentral rådgjevar for Singer då den rike amerikanaren ytte tilskot til både sjukehus og vegar i fjorden.

Frå 1924 til 1959 eigde Yris Hotell den store Briksdalsbre-restauranten oppe i dalen. Der var også hotell.

Utvida hotellet

Yris Hotell vart utvida fleire gonger. Den gamle trebygningen vart totalskadd av brann i 1977, og erstatta med eit nybygg som var tilpassa ein gjesteromsfløy i betong som var bygd på 1960-talet.

Hotellet brenn i juni 1977

Dei siste åra har hotellet hatt skiftande eigarar, og har m.a. fungert som asylmottak.