Fredag testa ein av medarbeidarane positivt, og heile NRK-teamet måtte difor testast og vart sett i 14-dagars karantene på hotellet i tyske Oberstdorf.
Testane stadfestar no at fleire i teamet er smitta. Alle NRK sine medarbeidarar i Tyskland blir verande i karantene.
Ein av dei som testa positivt er kommentator i NRK Sporten, Jann Post.
– Det er sjølvsagt ikkje hyggeleg, men eg håpar at dette skal gå greitt, seier Post.
Må kommentere frå hotellrommet
– Dette betyr at vi må sitte på hotellrommet og kommentere medan vi ser bilete frå tysk TV, forklarar han.
– Det er sjølvsagt ikkje ideelt. Ein er ikkje i løypa og får ikkje snakka med folk. Heldigvis har vi litt erfaring, så eg trur vi skal klare det på ein grei måte, seier Post.
Trass i positiv test, er forma fin.
– Eg er litt sår i halsen og hatt litt vondt i hovudet i eit par dagar, men helsa er eigentleg veldig fin.
– Det blir eit ganske langt opphald på eit hotellrom i Tyskland, avsluttar han.
- Les også: Iversen trekker seg fra kvartfinale og resten av Tour de Ski
- Les også: Karlsson knallhardt straffa etter regelbrot – no reiser ho heim
Har sendt nytt team til Tour de Ski
– Det er veldig kjedeleg sjølvsagt. Det er mange som blir smitta om dagen, så det viktigaste no er at dei som er smitta har det bra og er i relativt god form, seier redaksjonssjef i NRK Sporten Anders Sårheim.
– Vi skal nok løyse dette med innhald og journalistikk etter kvart, legg han til.
I dag har Tour de Ski flytta frå tyske Oberstdorf til italienske Val di Fiemme.
– Vi har erstatta dei som no sitte i karantene i Tyskland, med eit nytt team som reiste frå Oslo i går, slik at vi har journalistar og ekspertar på plass i Italia frå i dag, forklarar Sårheim.
Dei siste renna frå Tour de Ski blir sendt som planlagt på radiokanalen NRK Sport.