– Klokka 16.20 fekk vi melding om ei møteulykke mellom ein personbil og ein lastebil. To personar sat fastklemde i personbilen. Begge vart erklært omkomne på staden, seier operasjonsleiar i Møre og Romsdal politidistrikt, Kenneth Sætre, til NRK.
Ulykka skjedde på Høgset like ved Gjemnessundbrua, som er ein del av europavegen på strekninga mellom Molde og Kristiansund. Fartsgrensa på vegen er 80 kilometer i timen.
Menn i 20-åra
Politiet opplyser klokka 21.45 at dei to omkomne er menn i 20-åra. Begge er frå Kristiansund. Dei pårørande er varsla.
Føraren av lastebilen skal vere uskadd.
Politiets kriminalteknikarar er per klokka 21.45 ferdige på staden. Ein patrulje var igjen. Bilberging og opprydding stod igjen.
– Det kjem neppe informasjon om grunn til ulykka i dag, seier Kenneth Sætre måndag kveld.
Vegen var stengt
Vegen var sperra og han var stengt heilt fram til klokka 22.35 måndag kveld.
I mellomtida var det skilta omkøyring.
Ifølgje politiet gjekk trafikken greitt per klokka 17.15.