Suel Kassembo er landets einaste i kyrkjeasyl – lagmannsretten behandlar ankesaka – NRK Møre og Romsdal

Saka oppsummert

Suel Kassembo har budd i Noreg i 20 år, men norske styresmakter vil ha han ut av landet.
Han fekk avslag på asyl i januar 2007, og blei utvist i 2010. Han har seinare også fått avslag på arbeidsløyve. Fleire klagesaker har ikkje endra dette.
Han har søkt tilflukt i Herøy kyrkje på Sunnmøre sidan romjula i fjor.
Kassembo hevdar han er frå Burundi og var i livsfare på grunn av faren sitt politiske engasjement.
Advokaten hans, Arild Humlen, meiner saka er unik og prinsipielt viktig.
Han meiner det er stor sjanse for at saka hamnar i Høgsterett, dersom Kassembo taper også i lagmannsretten.
Støttespelarane til Kassembo har samla inn nesten ein halv million kroner til rettssakene.

Oppsummeringa er laga av ei KI-teneste frå OpenAi. Innhaldet er kvalitetssikra av journalistar frå NRK før publisering.

Ingen andre i Noreg bur som Suel Kassembo. Sidan romjula i fjor har Herøy kyrkje på Sunnmøre vore heimen hans. Han fryktar politiet kjem til å sende han ut av landet med tvang, dersom han går ut for dørene.

Rett før jul i fjor slo Oslo tingrett fast at han må ut av landet, og at han har oppheldt seg ulovleg i Noreg i 20 år. I dag startar ankesaka.

– Eg er veldig spent på kva som kjem til å skje i lagmannsretten. Eg håper det går bra denne gongen, seier Kassembo.

Les også: Politiet har ingen umiddelbare planar om å hente Suel ut av kyrkjeasyl

Avviste sentralt punkt for støttespelarane

Suel Hussein Kassembo har heile tida hevda at han er frå Burundi og at han var i livsfare på grunn av faren sitt politiske engasjement. Dersom norske styresmakter hadde trudd på han då han kom, ville han truleg fått opphald i 2007.

Støttespelarane hans har lagt stor vekt på dette i kampen for at han skal få bli i Noreg. Dette poenget blei avvist i dommen i Oslo tingrett i fjor haust:

«Selv dersom UNEs avslag på asyl i 2007 var ugyldig, vil det altså ikke innebære at Kassembo på noe tidspunkt skal behandles som om han har hatt lovlig opphold i Norge.»

Meiner saka er unik

Advokaten til Suel Kassembo, Arild Humlen, meiner saka er unik og prinsipielt viktig. Humlen seier Kassembo blei vitne til drap på fleire familiemedlemmer, og difor er å rekne som eit offer. Ifølgje Flyktningkonvensjonen vil han då ha krav på opphald i Noreg.

Humlen meiner det er eit avgjerande poeng.

– Fordi det gir Kassembo ein rett til vern, og det vil også sikre at andre personar i tilsvarande situasjonar får det same vernet i Noreg, seier Humblen.

– Men kan styresmaktene ha tatt feil i så mange år?

– Eg kjenner ikkje til andre saker som har aktualisert dette temaet, men i den grad dei i dag hevdar noko anna, det får vi sjå i lagmannsretten, så tek dei feil, seier han.

Han meiner det er stor sjanse for at saka hamnar i Høgsterett, dersom Kassembo taper også i lagmannsretten.

Utlendingsnemnda (UNE) vil ikkje stille til intervju om saka no. Via presseavdelinga skriv einingsleiar Ina Fosse at dei ikkje ønskjer å førehandsprosedere saka i media.

– Vi vil forklare kva avgjerda vår byggjer på i retten, skriv ho.

Har samla inn ein halv million

Støttespelarane til Suel Kassembo har allereie samla inn nesten ein halv million kroner til rettssakene. No set dei i gang ein ny Spleis for å få inn 200 000 kroner til, opplyser Nils-Roar Hareide.

Kassembo håper at retten konkluderer med at saka skal behandlast i Utlendingsnemnda på nytt. I tingretten i fjor haust fortalde han om korleis foreldra blei drepne medan han gøymde seg.

– Det som har skjedd med mine foreldre, kan skje også med meg, så eg er veldig redd for å bli sendt tilbake, seier han.

Dette er saka

Suel Hussein Kassembo kom til Noreg i 2005 og ba om asyl.
Han hevdar han kjem frå landsbyen Buyenzi i Burundi og at både foreldre og systera blei drepne rett før han reiste.
Kassembo oppgav at han var 16 år gamal og ikkje hadde slektningar i live i heimlandet.
Dersom han hadde blitt trudd på dette, hadde han truleg fått opphald i Noreg.
Han fekk avslag på asyl i januar 2007, og blei utvist i 2010. Han har seinare også fått avslag på arbeidsløyve. Fleire klagesaker har ikkje endra dette.
Styresmaktene festar ikkje lit til historia hans. Dei meiner han er eldre enn han seier og kjem frå nabolandet Tanzania, ikkje Burundi.
Han har opphalde seg ulovleg i landet sidan han fekk avslag, for det meste på Søre Sunnmøre. Styresmaktene hevdar også at han har budd på skjult adresse.
Nyleg la han fram papir som han meiner dokumenterer både alderen og landet han kjem frå.
Styresmaktene festar ikkje lit til at dokumentet er ekte, men slår likevel fast at dei vil sende han tilbake til Burundi.
I august 2023 blei han pågripen av politiet for å bli send ut av landet.
Berre timar før flyet gjekk, fekk han medhald i at retten skal vurdere saka hans.
Det skjedde i Oslo tingrett i november 2023.
Støttespelarar har samla inn pengar til rettsaka. Over 10 000 menneske har skrive under på eit opprop for at Kassembo skal få bli i Noreg.
Oslo tingrett har tidlegare slått fast at vedtaka til Utlendingsnemnda er korrekte og at Kassembo må ut av landet.
Borgarting lagmannsrett behandla ankesaka i midten av oktober 2024 og gav han ikkje medhald.
Seinare har Høgsterett og Menneskerettsdomstolen avvist å behandle saka.