– Dette var ein veldig viktig kamp. Ein såkalla sekspoengskamp. Med siger er vi åtte poeng foran, hadde vi tapt hadde vi vore to poeng foran Notodden, kommenterte Hødd-trenar Lars Arne Nilsen etter kampen.
Espen Standal måtte starte på benken for første gong sidan 2. serierunde. I det 60. minutt blei han derimot bytta inn mot Notodden på Høddvoll.
I det 88. minutt blei eit bytte om til eit superbytte. Høgreback Akeem Latifu svinga inn frå høgre, og måltjuven frå Ørsta breisida inn 2–1 for Hødd.
Corner i mål
Notodden hadde på førehand prøvd å få utsett onsdagskampen mot Hødd. NFF sa derimot nei, og bortelaget kom til Ulsteinvik med i alt åtte spelarar ute med skader og karantenar.
Det gjorde at Hødd hadde ei gyllen moglegheit. Heimelaget førte kampen frå første stund, utan å vere heilt på topp. Dei fleste sjansane kom mot bortelaget sitt mål, og etter 23 minutt kom 1–0.
Hødd fekk corner, og corneren blei svinga fint inn. Etter litt rot i feltet, fekk Victor Grodås heada inn 1–0 på bakarste stolpe.
Bortelaget på si side verka ufarlege, men plutseleg var dei dødeleg effektive.
I det 32. minutt fekk Notodden corner, der Martin Holmen fekk heada inn 1–1 midt i feltet.
Medvinden aukar
Hødd starta sesongen elendig, men har klatre gradvis etter at vinden snudde i juni.
– Sigeren i dag er viktig i forhold til å berge plassen i Adeccoligaen, noko som er målet vårt, fortel Hødd-trenaren.
– De klatrar vidare, og medvinden held fram?
– Ja. Men vi spelar ingen god kamp i dag. Vi tek med oss sigeren, seier Lars Arne Nilsen.
Straffemiss frå veteranen
I andre omgang var bortelaget meir med på notane, men det var Hødd som førte kampen. Og berre fire minutt etter pause burde det stått 2–1 på Høddvoll.
AaFK-utleigde Kjell Rune Sellin snappa opp ballen, men blei felt på veg forbi keeper. Frå straffemerket fekk Erik Sandal prøve seg, men Hødd-veteranen si straffe blei for svak.
Notodden-keeperen redda.
Utover i kampen låg Notodden lågt og satsa på kontringar, medan Hødd pressa og pressa.
I det 88. minutt kom 2–1 ved Espen Standal – til stormande jubel frå Høddvoll-publikumet.
No er Hødd oppe på 11. plass. Heile fem lag er bak dei, og om blåtrøyene frå Ulsteinvik held fram i same spor, så vil nok plassen i Adeccoligaen vere berga.