Tre dagar før opninga, myldrar det av arbeidsfolk rundt den nye stasbrua i fylket. For når den sjette lengste brua i landet skal opnast, skal kvar einaste av dei 1290 meterane funke og funkle.
Det kan nok virke lettare kaotisk for oss utanforståande, men alt skjer etter ein opplagt plan. Med mange hundre hender i hektisk arbeid, kjem dei aller siste detaljane på plass før opningsfesten tar til laurdag.
Per Ståle Øvstedal som er bas i firmaet Arvid Gjerde AS ligg på kne og skrur for harde livet. Det er bretting av rekkverket det gjeld, og naturlegvis må det skje på tampen av bruarbeidet.
– Det er alltid vi som kjem inn i siste liten, heilt til slutt, smiler Øvstedal.
Rundt han var andre i full sving med tilpassing av kantstein, festing av plater på rekkverket, spyling, planering og pleie av vegkantane.
Innspurt høyrer med
Alt skal vere på beste vis, når statsminister Erna Solberg opnar brua laurdag. Og litt stress høyrer visst med på tampen av eit så stort anleggsarbeid.
– Ja, det er vanleg med ein hektisk innspurt. Det kan bli ein langspurt, eller ein kort, hektisk innspurt. Men framdrifta til brua har vi hatt god kontroll på heilt sidan i vår, forsikrar prosjektleiar Hallgeir Brudeseth i Statens vegvesen.
Fint i landskapet
Prosjektleiaren synest brua har blitt veldig fin, og det trur han dei fleste vil synest.
– Ho tek mykje av rommet i landskapet, men det blir ikkje styggare i ytre Tresfjord av brua, meiner Brudeseth.
Når Tresfjordbrua endeleg kan takast i bruk, blir det kortare avstandar for dei som bur i Vestnes kommune. Det blir også kortare veg til toget på Åndalsnes, til Bjorli og Oslo.
Bompengar er lite populært, men det er bygd 22 nye småvegar i området.
– For Vikebukt har det blitt fantastisk bra, og det har blitt eit flott anlegg, seier Bjørn Busengdal driftsleiar i Busengdal Transport.
Arbeidet med Tresfjordbrua har gått føre seg sidan vinteren 2013.
– No når vi straks er i mål, er det litt vemodig, vedgår Hallgeir Brudeseth.