Det er statsadvokaten som no har tatt ut tiltale mot ein mann i 40-åra frå Skodje, som skal ha skaffe hotellrom og leilegheiter til fleire utanlandske prostituerte.
– Det er vanskeleg å seie kor stort omfanget har vore, det er ein del av bevisføringa, så det vil eg ikkje seie noko om no, seier politiadvokat Gudrun Kalvatn ved Sunnmøre politidistrikt.
Ho vil heller ikkje seie kor mange kvinner som skal ha vore involverte i prostitusjonen, heller ikkje kor mange hotellrom og leilegheiter mannen skal ha disponert.
Sjeldan sak
Det er lovleg å selje seksuelle tenester i Noreg, men ikkje å kjøpe, heller ikkje å tene pengar på andre sin prostitusjon.
Kalvatn kan ikkje minnest at Sunnmøre politidistrikt nokon gong før har tatt ut tiltale i ei prostitusjonssak, og ho seier det ikkje er aktuelt å tiltale fleire i denne saka.
– Eg veit ikkje om vi nokon gong har gjort det før, seier ho.
– Kor enkelt vil det bli å føre bevis i ei slik sak?
– Det kan bli utfordrande både fordi saka er gamal, og det kan bli vanskeleg å få tak i dei utanlandske kvinnene, seier ho.
Tips frå naboar
Ifølgje politiet var det truleg tips frå naboar til ei av leilegheitene som sette politiet på sporet av saka.
Ifølgje tiltalen kan det bli lagt ned påstand om inndraging av pengane som mannen eventuelt kan ha tent på å vere bakmann for prostitusjonen, men Kalvatn vil ikkje seie noko om kor store verdiar det kan vere snakk om.
– Det har eg ingen kommentar til, det er alt for tidleg å seie, og ein del av bevisføringa, seier ho.
Skjedde i 2011
Ifølgje tiltalen skjedde prostitusjonen våren og sommaren 2011, og først over fire år seinare er det no tatt ut tiltale. Kalvatn vedgår at det er lenge.
– Fire års saksbehandlingstid er ikkje akseptabelt, men politiet har hatt mykje å gjere i lang tid, seier ho, og legg til at dette sikkert vil påvirke ei eventuell straffeutmåling.
Vedgår ikkje straffskuld
Anders Svinø er advokat for mannen. Han vedgår ikkje straffskuld. Svinø meiner det er sterkt beklageleg at det har gått så lang tid.
– Det er sterkt beklageleg. Dette er forhold som skal ha skjedd i 2011. Det har gått mange år sidan mannen blei avhøyrt, seier Svinø.
Saka skal opp i Sunnmøre tingrett 21. oktober.