Siger til Molde Elite – sikra plass i sluttspelet
Molde Elite vann over Tertnes i kveldens handballkamp. Resultatet blei til slutt 30–28 til moldensarane. Til pause leia Tertnes med tre mål. Dei leia også mykje av andre omgang, men rundt femten minutt ut i omgangen greidde Molde Elite å gå forbi Tertnes. Christine Karlsen Alver scora flest mål for Molde med sju mål.
Med sigeren i boks er Molde Elite også sikra ein plass i sluttspelet. Dei ligg no på ein åttandeplass på tabellen i eliteserien i handball og det er nemleg dei åtte beste laga som går til kvartfinalane i sluttspelet.
Trenar Tor Odvar Moen seier at dette er noko dei har jobba mot.
– Det har vore ei gulrot for oss når vi låg litt lenger nede på tabellen med mindre poeng. No blir det spennande kven vi møter, seier han.