I dag får ferjefrie samband nytte dei pengane som blei brukte på ferjedrifta i 15 år etter at sambandet er ferdig. Regjeringa vil i nasjonal transportplan forlenge denne perioden til 30 år. Dette har vekt begeistring hos politikarar i Møre og Romsdal.
Fleire hundre millionar
Nordøyvegen er det ferjeavløysingsprosjektet fylket har prioritert som nummer ein. Oddbjørn Vatne (Sp) er tidlegare prosjektleiar for Nordøyvegen, og seier at dette er eit stort framsteg for prosjektet. - Dette vil gje fleire hundre millionar til Nordøyvegen. Det betyr at vedlikehaldet vil vere betalt i 30 år - fylket treng ikkje leggje inn pengar etter at vegen er bygd. Eg håpar på at vi kan få gjennomført ein kombinasjon av ferjesubsidiar og rentefrie lån både for Nordøyvegen og andre av dei fjordkryssingane vi held på å planleggje, seier Vatne.
- Sikker på vedtak
- Dette vil vere eit svært viktig bidrag til å gjennomføre Møreaksen, seier styreleiar Helge Orten. - Håpet mitt er at dei også kan vere meir fleksible når det gjeld bompengeperioden i ferjeavløysingsprosjekt. Eg er nokså sikker på at forslaget frå regjeringa blir vedteke.
- Flaggdag
- Dette er ein flaggdag for Møre og Romsdal, seier stortingsrepresentant Eisabeth Røbekk Nørve (H). - Dette vil løyse mange flokar når det gjeld å få sett i gang viktige vegprosjekt både i Møre og Romsdal og andre ferjefylke.