Peter Opsvik, Tripp Trapp-stolens far, er død

Opsvik gjekk bort måndag, 85 år gamal. Det opplyser familien til Dagbladet Børsen.

Han blei født i Stranda kommune på Sunnmøre i 1939. Opsvik er ein norsk industridesignar, møbeldesignar og jazzmusikar.

Mange kjenner han nok som Tripp Trapp-stolens far. Den ikoniske stolen blei lansert for Stokke i 1972 og er Noregs suverent mest selde stol. Det er selt fleire millionar eksemplar av stolen verda over.

Opsvik har opp gjennom åra fått ein rekke prisar og utmerkingar. I 2006 blei Tripp trapp-stolen kåra til tidenes norske møbel.

Her kan du lese meir om historia til stolen:

Viktig møbeldesignar

Også faren til Peter, Nils Opsvik, var opptatt av møblar. Onkelen Jon Ringstad etablerte møbelfabrikken Stranda Industri A/S, der faren blei medeigar.

Etter kvart følgde Peter i faren sine fotspor. Det har fått stor betydning for møbelbransjen.

– Peter Opsvik var Noregs viktigaste designar. Han er den mest kjende og profilerte norske møbeldesignaren gjennom tidene. Det er verkeleg ein designar som har sett spor etter seg, som no har gått bort, seier Eldar Høidal ved Møbelmuseet i Sykkylven.

Han vektlegg at Opsvik også står bak mykje meir enn berre Tripp Trapp-stolen.

Opsvik er mellom anna kjent for å ha designa kontorstolen Capisco og for sitt fokus på ergonomi i produkta sine, som for eksempel i Balans-stolane.

– Det var han som innførte omgrepet ergonomisk design. At eit møbel skal vere godt å sitte på. Godt for ryggen og godt for kroppen. Så han har verkeleg tenkt nytt når det gjeld det å sitte, seier Høidal.

– Han kom med noko heilt nytt inn i møbeldesignen. Han var ein leken og eksperimentell designar.

Høidal vektlegg at kontorstolane som Opsvik har designa har blitt selt verda over. Han peiker også på at møbeldesignaren var opptatt av miljøvern.

– Han var miljøbevisst og samfunnsbevisst. Han var ein global designar som tenkte stort.

Også Tripp Trapp-stolen var laga for å vare i mange generasjonar.

– Den veks med barna og kan bli arva gjennom generasjonar. Det er ein stol som nesten ikkje kan bli slite ut. Så også der kjem miljøperspektivet inn. Det er ein enkel konstruksjon, men ein veldig genial stol, seier Høidal.

Fekk ideen etter at han blei far

Ideen til Tripp Trapp-stolen oppstod då Peter Opsvik fekk sonen Tor. Då guten var klar for matbordet fann far fram telefonkatalogar som toåringen kunne sitte på.

Så sette han seg etter kvart framfor teiknebrettet.

Opsvik meinte at problemet med andre barnestolar var at ungane vaks ut av dei. Og ikkje minst, at dei ikkje kunne bevege seg så mykje.

Mantraet hans var: «Den beste stillinga er den neste».

Med Tripp Trapp-stolen fekk barna ein stol der dei kunne bevege seg. Samtidig kunne dei vekse med stolen.

Etter kvart tok interessa for stolen av. Frå 1973 til 1974 steig salstala frå rundt tre stykk til 10.000. Sidan har stolen blitt selt verda over.

Hadde fleire interesser

Ein av Opsvik sine andre lidenskapar var jazzmusikk. Han spelte både saksofon og klarinett og var med i Christiania Jazzband frå 1972 og Christiania 12 frå 1973.

I 1973 fekk han og Christiania Jazzband Spellemannprisen.

I 1999 kom plata Woodwork (NorCD), der han speler frijazz og samtidsmusikk. Opsviks son, Eivind Opsvik, er også jazzmusikar.

Opsvik arbeidde også med grafikk, bilete og objekt. Han debuterte på Vestlandsutstillingen i 1966 og Statens Høstutstilling i 1967.

I år 2000 etablerte Opsvik og medlemmer av familien miljøstiftinga The Minor Foundation, som kvart år gir pengar frå aksjeutbyttet til miljøprosjekt over heile verda, ifølgje Store norske leksikon.