Overraska over at Telenor vil rive radiosendar

Mellombølgesendingane frå Vigra kringkastar har spelt ei viktig rolle sidan dei blei sett i drift i 1935. Då 2. verdskrig braut ut vart sendaren sett på som den viktigaste i landet. I mai 1940 vart sendaren bomba og åtte år seinare blei den gjenoppbygde stasjonen opna av kong Haakon. Den 232 meter høge masta er borte, men framleis står bygga igjen etter kringkastaren.

Vil fjerne bygget

No ynskjer Telenor og Norkring å rive dei to største husa ved anlegget. Både Venneforeininga og Giske kommune har protestert. Heller ikkje kulturavdelinga i fylket vil tilrå riving.

– Eg er svært overraska. For nokre år sidan gjekk vi med på riving av den høge Vigramasta med føresetnad om at dei andre kulturminna vart bevart, seier bygningsantikvar Christ Allan Sylte.

• Sjå Vigra kringkastar i Norge Rundt

Avtale med grunneigar

Telenor Broadcast seier at Norkring har bestemt seg for riving fordi dei har ein avtale med grunneigar om å rydde opp etter seg. Dei har prøvd å få til ei museumsløysing utan å lukkast og meiner at riving dermed er det einaste alternativet.

Bygningsantikvar Sylte vil no diskutere saka med Riksantikvaren. Dei vil også kontakte Telenor for å høyre kva som er grunnen til søknaden om riving.

– I deira eigen landsomfattande verneplan har dei foreslått å vere dette kulturminne, seier Sylte.