– Sist eg opptredde så vart eg veldig overraska, for eg vann på publikumsstemmer. Det hadde eg ikkje ein gong turt å innbille meg, seier Trygve Nystøyl.
Så langt har det gått bra for Trygve Nystøyl i songkonkurransen The Voice, i Chile. Dersom han får nok stemmer frå publikum sundag, så går han vidare.
– Me er åtte deltakarar igjen, og me skal i elden igjen i dag, seier Trygve.
Vil drive med musikk
Trygve Nystøyl kjem frå Hakkallestrand i Vanylven, og då han flytta til Chile for 13 år sidan vart han verande, med god grunn.
– Eg vart forelska, og så flytta eg, seier han.
Tidlegare har han jobba på ein offshore-båt, og det siste året har han jobba hjå ein skipshandlar. Men, jobb er det lite tid til no som han har blitt The Voice-stjerne.
– Eg har tatt med fri for å halde på med The Voice, så det eg håpar på no, viss eg har maks flaks, er at det blir finale, seier han.
– Etter å ha vore deltakar her, så håpar eg å kunne fortsette og jobbe med musikk, seier Trygve.
Må bevege seg meir
I Chile har det ikkje vore The Voice før i år, og det er rundt ein til ein og ein halv million sjåarar som ser på kvart av dei mange TV-programma. Det er noko Trygve ikkje tenkjer så mykje over.
– Viss eg byrjar å tenkje på det, så blir eg nok nervøs. Det er nok best å ikkje tenkje, seier han lattermildt.
Nordmannen har fått mange tilhengarar, og dommarane er nøgde med han. Trygve legg vekt på at den kritikken han har fått har vore konstruktiv.
– Kritikken går på framføringa, ikkje synginga. Eg må bevege meg litt, og eg må synge med kroppen, ikkje berre opne munnen og synge. Eg må leve meg meir inn i musikken, seier han.
– Eg har fått god hjelp til å betre det eg har gjort feil, seier Trygve.
Trur ikkje han vinn
Dei siste vekene har sunnmøringen vore i studio og øvd, frå tidleg om morgonen til seint på kveld. Sundag skal han i elden igjen, på direktesendt TV.
– Trur du at du vinn heile greia då?
– Nei, det trur eg ikkje, men slik eg ser det, så har alle som har kome så langt som eg har kome no vunne, seier han.
– At eg skal vinne heile greia torer eg ikkje å tru, legg han til.
Programmet byrjar sundag klokka 22.30 chilensk tid (klokka 02.30 måndag, norsk tid).
SJÅ FRAMFØRINGA FRÅ SIST VEKE: