Politiet fekk melding om ulykka i Ulsteinvik på Sunnmøre klokka 00.39 natt til søndag. Ifølge meldingane var det snakk om ein kollisjon mellom ein MC-førar og ein bilførar.
Naudetatane kom raskt til staden og luftambulansen blei etter kvart tilkalla. Denne landa like etter klokka eitt. Rundt klokka 01.50 blei den skadde frakta til St. Olavs hospital i Trondheim med luftambulanse.
Føraren av motorsykkelen, som er i tenåra, skal vere alvorleg skadd. Personen skal ifølge politiet ha blitt kasta av motorsykkelen i samanstøyten.
Søndag morgon har det ikkje kome nye opplysningar om helsetilstanden til føraren av motorsykkelen.
Føraren av personbilen er ein mann i 20-åra, opplyste politiet til Sunnmørsposten natt til søndag. Han skal ikkje ha fått fysiske skader i kollisjonen.
Tekniske undersøkingar
Ulykka skjedde i Sjøgata, som ligg i sentrum av Ulsteinvik. Kriminalteknikarar frå politiet og ulykkesgruppa til Statens vegvesen har i natt jobba på staden. Desse undersøkingane blei avslutta søndag morgon.
Ulykka skjedde i sentrum av Ulsteinvik.
Foto: TipsarVegen var difor stengt i ein periode etter ulykka, men blei opna igjen klokka 06.30.
Det skal ha vore vitne til ulykka, som politiet har avhøyrt. Roar Fylling, operasjonsleiar i politiet i Møre og Romsdal, opplyser at dei vil halde fram med etterforskingsarbeidet i dag.
– Vi skal ta ein del vitneavhøyr i dag og vil etterforske saka vidare, seier Fylling til NRK søndag morgon.
Operasjonsleiaren seier at det så langt er for tidleg å seie noko om kva som var årsaka til ulykka.
