Vedkomande var nedkjølt, men vaken og kunne snakke med redningsmannskapa då ho blei berga. Ho blei frakta til sjukehus med redningshelikopter.
– Det var eit turfølgje på tre personar der ei kvinne blei tatt av raset, seier operasjonsleiar Leif Arne Mork i Møre og Romsdal politidistrikt.
Søndag ettermiddag opplyser Helse Møre og Romsdal til Sunnmørsposten at den unge kvinna har alvorlege skader, men er stabil. Ho fekk då behandling på intensivavdelinga ved Ålesund sjukehus.
Populært turområde
Snøskredet gjekk på fjellet Sylvkallen like ved bygda Standal i Ørsta. Dette er eit svært populært turområde i Sunnmørsalpane like ved Hjørundfjorden.
Varsom.no har meldt betydeleg fare for snøskred i området.
Alle naudetatar, redningshelikopteret i Florø, luftambulansen i Ålesund, Norske Redningshunder og skredgruppa til Røde Kors blei mobilisert i arbeidet med å finne kvinna.
Det er foreløpig ikkje klart korleis kvinna blei funne og berga ut av skredet.
– Luftambulansen frå Ålesund hadde kome fram til staden og hang over skredet då vi fekk beskjed om at ho var lokalisert. Vi veit ikkje om det var kameratane eller luftambulansen som fann ho, seier Vincent Roos ved Hovedredningssentralen i Sør-Noreg.
Børulf Lefdal i Røde Kors opplyser til NRK at dei rykte ut til staden med mannskap frå Ørsta/Volda skredgruppe. Mannskap frå hjelpekorpset i begge kommunane blei også kalla ut, men kvinna blei funne før dei kom i aksjon.
I 2007 døydde ein tsjekkisk skiløpar i eit snøskred i same område.
