Sist ut: Ei dame som posta strikketøy.
– Det var ei hyggeleg vaksen dame her torsdag, og ho blei ekspedert av våre kundebehandlarar, opnar Geir Gjelsten.
Han er dagleg leiar ved Ålesund postkontor, og leitar no etter ei strikkeglad dame.
– Ho hadde eit sånt fint strikketøy som ho skulle sende til ein eller annan. Det blei litt diskusjon og kundebehandlarane skrytte og beundra strikketøyet. Ho kjøpte øskje og frimerke, men så gløymde ho å skrive adressat og avsendar.
No ligg sendinga i Ålesund.
– Eg veit ikkje kvar vi skal sende den, slår Gjelsten fast.
«Kommisjonen for ubesørgeleg post»
Pakken er ikkje åleine om å vere åleine i verda, utan noko mål i eit kort liv.
– Det skjer nok «dann og vann», minst éin gong i veka, fortel Gjelsten til NRK.
Ålesund postkontor er eitt av mange postkontor, og med stablar av pakkar utan mottakar må Posten gjere noko for å få pakkane dit dei skal. Posten skal jo fram!
– Om vi ikkje greier å få tak i dama med strikketøyet no, så har vi rutinar for slikt. Då sender vi det til ei «ubesørgeleg»-avdeling i Posten.
«Ubsørgelege» pakkar er dei som altså ikkje har moglegheita til å nå mottakar av delvis eiga maskin.
– Avdelinga undersøker meir. Dei har lov til å gå inn i sendinga for å sjå om det står noko om avsendar og adressat der. «Kommisjonen for ubesørgeleg post» heitte den éin gong i tida. Så dei er profesjonelle og jobbar med dette.
– Trur ho var sunnmøring
Ein finn ikkje alltid fram til pakken sin avsendar eller håpt mottakar, men oftast kjem pakkane fram, seier Gjelsten.
Pakken som no er «vêrfast» i Ålesund skal i alle fall til Noreg.
– Ja, det er norsk porto, så det er nok i Noreg.
Etter litt detektivarbeid har dei òg kome fram til at dama truleg ikkje er frå byen.
– Nei, vi trur ikkje ho er frå Ålesund, for då trur eg vi hadde kjent ho igjen. Men eg trur ho var sunnmøring, det meiner vi utan å vere 100 prosent sikre.
No håper den daglege leiaren ved Ålesund postkontor at avsendar tek kontakt.
– Det var ved Ålesund postkontor i går, cirka klokka fire. Pakken låg på transportbandet vårt, der vi plukkar sendingane våre frå. Det var både fint og ein spesiell teknikk som blei brukt i strikkinga, visst nok, så no håper vi at mottakar kan få dette strikketøyet, avsluttar Gjelsten.
Veit du kven det er sin pakke? Kontakt oss på mr@nrk.no om du trur du veit avsendar eller håpt mottakar er.
