– Kristiansund kommune bruker meir pengar enn vi får inn, det betyr at innstrammingar må til, seier økonomisjef Per Sverre Ersvik.
I løpet av månaden må politikarane ta stilling til ein tiltakspakke.
Betydelege utfordringar
Økonomirapporten blir lagt fram i formannskapet i dag.
– Vi har betydelege utfordingar i den kommunale drifta, vedgår økonomisjef Ersvik.
– Det er ikkje tvil om at vi no har eit driftsnivå som ligg høgt i forhold til dei utgiftene vi har.
Både barnehagar, sjukeheimar, heimeteneste og brannvesen bruker meir pengar enn dei har budsjett til.
Det kostar også meir å gi butilbod til vanskelegstilte enn det ein rekna med på førehand.
14 millionar kroner
Til saman er det snakk om eit overforbruk i Kristiansund på 14 millionar kroner, som bystyret skal diskuter før sommerferien.
Rådmannen tek sikte på å legge fram ein tiltaksplan for bystyret 25.juni.
– Rådmannen meiner det skal vere mogleg å få til dette utan dei altfor store konsekvensane, likevel vil det vil nok merkast på somme område, seier Ersvik.
