Kringsjå sykehjem i Kristiansund

Hopp til innhold

Kringsjå sykehjem i Kristiansund

17. februar 2020 kl. 10:57
Stor auke i avviksmeldingar

Talet på avviksmeldingar ved Kringsjå sjukeheim i Kristiansund eksploderte etter at NRK omtalte forholda for pasientane for eitt år sidan. Fylkeslegen slo då fast at sjukeheimen braut lova på fleire punkt og at alvorleg sjuke pasientar ikkje fekk nok mat og medisinar. I ein ny rapport frå kommunen kjem det fram at det var 27 avviksmeldingar same månad, mot eitt i februar året før. Også dei andre sjukeheimane hadde ein kraftig auke i talet på avviksmeldingar. Kommunen meiner forholda no er langt betre.

Foto: Roar Halten / NRK
Kringsjå sykehjem i Kristiansund

11. oktober 2019 kl. 07:52
Har sett inn tiltak

Kristiansund kommune har no levert eit 50-siders dokument med tiltak for å betre forholda på sjukeheimane i kommunen. Dette skjer etter kritikken mot forholda ved Kringsjå sjukehjem. Tidlegare i år slo fylkeslegen fast at bemanninga var så låg at pasientar risikerte å få for lite mat og medisinar. Kommunalsjef Siv Iren Stormo Andersson skriv at det er for tidleg å dokumentere effekten av tiltaka. Fylkeslegen har i haust varsla tilsyn på Kringsjå, med 24 timars varsel.

Foto: Eirik Haukenes / NRK
Kringsjå sykehjem i Kristiansund

10. juli 2019 kl. 06:23
Fleire klagar på sjukeheim

Det har det kome inn fleire varsl til Fylkesmannen etter at det i vår blei kjent at bemanninga ved Kringsjå sykehjem i Kristiansund var så låg at det var fare for at pasientar fekk for lite mat og medisinar. Desse gjeld både Kringsjå og andre sjukeheimar. – Vi har fått inn fire ekstra varsel, og fleire pårørande har teke kontakt, seier fylkeslege Karin Mûller Mikaelsen, som vil følge opp desse.

Foto: Eirik Haukenes / NRK
Kringsjå sykehjem i Kristiansund

8. juli 2019 kl. 16:21
– Har jobba systematisk

Kringsjå sykehjem har betre pleie og omsorg no enn då Fylkesmannen hadde tilsyn i fjor, seier informasjonsleiar i Kristiansund kommune Tore Lyngvær. – Vi har jobba ganske systematisk sidan tilsynet. Vi har auka bemanninga og endra turnusen. Generelt går det betre no. Alt skjer no i samsvar med regelverket, men vi kan framleis bli betre, seier Lyngvær til NRK.

Foto: Roar Halten / NRK
Kringsjå sykehjem i Kristiansund

8. juli 2019 kl. 15:56
Kritikken står ved lag

Kritikken av Kristiansund kommune etter tilsyn ved Kringsjå sykehjem for eitt år sidan, står ved lag også etter ein gjennomgang av tilsvaret frå kommunen. Fylkesmannen står fast ved at der skjedde brot på fleire område. Mellom anna var bemanninga for låg, og det var for lita tid til å gi pasientane nok mat og medisinar. – Då vi gjorde tilsyn i fjor fann vi at Kristiansund kommune ikkje hadde god nok oversikt over risikoområde, og at det dessverre ikkje var sett i gang tiltak for å sikre at tiltaka vart lukka, seier fylkeslege Karin Müller Mikaelsen (biletet) til NRK.

Foto: Hans-Olav Landsverk / NRK