- Tar du vaksinen har du større sjans til å få ei mildare utgåve av influensaen og unngå komplikasjonar, seier Roar Pedersen som er smittevernlege i Ålesund.
Vaksinen er ikkje farleg, seier doktoren og han oppmodar om at risikogruppene tar imot vaksine - i god tid - før influensaen er her.
Spesiell situasjon i fjor
Hausten i fjor var spesiell. Då blei det oppfordra til massevaksinasjon mot svineinfluensa. Kommunane og folk flest retta seg etter oppfordringa frå styresmaktene. No hevdar mange at dette var å overdrive.
- Den viktigaste kritikken er vel kanskje at styresmaktene ikkje tona det ned fort nok, seier Pedersen.
Ein kan ikkje utelukke nye tilfelle av svineinfluensa, og vaksinen i år er laga slik at den skal beskytte også mot dette viruset. Men skepsisen rår.
Oddny Skarbø er ei av dei som har tatt influensavaksine i mange år.
- Men når det no har blitt ei blanda vaksine er eg litt i tvil, seier ho.