Ekspedisjonsskipet ligg til kai ved Hellesylt i Stranda, og har filippinsk mannskap. Hurtigruten har fått kritikk frå fleire hald for verksemda.
– Brot på lova
Fellesforbundet og Sjømannsforbundet har meldt Hurtigruten til politiet for brot på utlendingslova, og måndag var reiarlaget i møte med næringsminister Iselin Nybø.
Ho var heilt klar på at ho meiner verksemda er i strid med norsk lov, og varslar ei ny forskrift for å tydeleggjere dette. Ho sa også at ho forventa at Hurtigruten godtok departementet si tolking av lova.
Hurtigruten meiner framleis at dei ikkje handlar i strid med lovverket, men vil no likevel gå departementet i møte.
Statsråd Iselin Nybø seier til NRK at ho heile tida har vore krystallklar på at det har vore i strid med regelverket for NIS-skip å drive hotellverksemd i norske hamner. No jobbar departementet med å endre forskriftene for å hindre at noko liknande skjer igjen. Nybø seier at ho er glad for at Hurtigruten har tatt signala på alvor og at dei no rettar seg etter dette.
– Vil sjå på alternative løysingar
Anne Marie Bjørnflaten, direktør for myndigheitskontakt i Hurtigruten skriv i ein e-post til NRK:
– Utleiga av MS Fridtjof Nansen til ein filmproduksjon er ei heilt ekstraordinær enkelthending. Sjøfartsdirektoratet har avklart at bruken av skipet ligg godt innanfor NIS-forskrifta, og er dermed lovleg.
Men sjølv om dei meiner dei ikkje bryt lova, vil dei no sjå på alternative løysingar. Om dette inneber å tilsette norsk arbeidskraft, vil ikkje Bjørnflaten svare direkte på.
– Når statsråd Iselin Nybø uttalar seg så tydeleg, ønsker vi å vere konstruktive og finne løysingar. Difor ventar vi ikkje til forskrifta er på plass, men jobbar no med alternativ for å løyse situasjonen.
Bjørnflaten skriv at dette er dei no i dialog med departement, tillitsvalde og oppdragsgjevar om.
NRK kjenner til at Hurtigruten søker internt etter personell som snarast kan ta servering og reinhald i eit oppdrag som varer i to og ei halv vekes.
Ser berre ei løysing
Johnny Hansen, forbundsleiar i Sjømannsforbundet meiner det berre er ei løysing på denne saka.
– Det er at dei set inn eit skip som er registrert i det ordinære NOR-registeret, med mannskap som har arbeidsløyve. Og det er signal som tyder på at det er det dei no vil gjere, noko dei burde gjort for lenge sidan, seier han.
– Kva synest du at dei vil endre drifta etter møtet med næringsministeren?
– Det var jaggu på tide! Det var dette vi råda dei til å gjere før dei sette skipet i drift, seier han.