– Før var vinden min verste fiende, for då kom flekkane mine fram. No er det ikkje noko problem, smiler Henriette Olsson Hareide frå Ulsteinvik.
Ho sit i frisørstolen i Ålesund og har fått ny parykk. Det er vanskeleg å sjå at det lange, brunraude håret ikkje er hennar eige.
Oppdaga hårlaus flekk
Då ho var 12 år oppdaga ho sin første hårlause flekk i bakhovudet. Det viste seg at det var hårsjukdomen alopecia, men sidan flekken var så liten og lett å kamuflere, fekk ho inga behandling. Først då ho blei gravid som 23-åring, eskalerte hårtapet og ho måtte bruke to timar kvar morgon for å dekke over dei hårlause områda. Ho kunne heller ikkje ta medisinar på grunn av babyen.
– Plutseleg miste eg mykje på kort tid, og då bestemte eg meg for at no treng eg parykk. Det gjekk ikkje an å gå utan, seier Hareide.
Gruar seg til 30-årsdagen
Ho blei overraska over kor mange val ho hadde, men også over prisane. 23.000 kroner er prisen for ein parykk som berre varer eit halvt år. Så lenge ho er under 30 år, får ho dekt inntil 50.000 kroner i året. Etter det blir stønaden redusert til 5725 kroner i året. No gruar ho seg til 30-årsdagen.
– Det er jo ikkje slik at dei over 30 år har mindre behov for å føle seg fin, seier Henriette, som fryktar at ho må bruke mykje av løna si til parykk i framtida.
Krev høgare satsar
Oda Molstad er leiar i Alopeciaforeininga. Ho er sjølv 29 år og har ein eigen sparekonto til parykk, fordi ho veit at stønaden ho får ikkje vil dekke utgiftene.
– Problemet er at prisen på parykkar har auka vesentleg dei siste åra, men stønaden er ikkje regulert i samsvar med det, seier Molstad. Foreininga meiner at satsane må aukast for dei over 30 år.
Forstår problemet
– Det er viktig å understreke at også personar over 30 år får støtte til parykk, seier statssekretær i Arbeids og inkluderingsdepartementet., Truls Wickholm.
Han seier at det kan stemme at prisane på parykkar har auka dei siste åra, utan at satsane har auka i takt med prisstiginga.
– Arbeidarpartiet var kritisk til denne måten å gjere det på. Korleis utviklinga blir vidare, er noko vi må komme tilbake til i samband med dei årlege budsjetta, seier Wickholm.
Får donorhår
Frisør og hårspesialist ved Apollo hårsenter, Reidun Høybakk, forstår at Henriette gruar seg til å få mindre støtte til parykk.
– Parykk kostar ein del. Spesielt unge jente vil ha litt lengde på håret og vere ungdom og då ligg det på nærare 25.000 kroner, seier Høybakk.
Om nokre månadar får 25-åringen ny parykk. Dette er ein donorparykk, laga av ekte hår. Ho har også begynt å få tilbake litt hår.
– Eg får jo litt trua då, men det er uføreseieleg. Den eine dagen kan det komme tilbake og neste dagen kan eg miste det, seier Henriette.