Heimestrikka vottar, tekstil, keramikk, foto og måleri er noko av det som er utstilt i galleriet som opna i Ålesund i dag. Dei tre kvinnene som driv galleriet har også verkstad vegg i vegg der dei produserer sin kunst. Dei såg behovet for ein stad der unge, uetablerte kunstnarar og handverkarar kunne vise fram produkta sine.
– For dei utan ei høg kunstfagleg utdanning, kjem du ikkje inn i dei vanlege galleria. Vi vil vere eit tilbod for dei unge med mindre erfaring, seier Mailen Tørlen.
Ideell organisasjon
Ho driv galleriet saman med Silje Engstrøm og Anniken Hessen. Ingen av dei lever av kunsten, men draumen er nettopp å ha kunsten som levebrød.
Smia er organisert som ein ideell organisasjon. Det betyr at gallerieigarane berre tar nokre prosent av salssummen av tinga dei sel for andre.
– Smia skal vere ein stad der unge kunstnarar og kunstinteresserte møtast og kanskje opplever anna kunst enn hos dei etablerte, seier Tørlen.
Godt vaksne
Dei vil ta imot kunst frå heile Møre og Romsdal. Spesielt er dei på utkik etter eksperimentell moderne kunst. Eit av kriteria er at kunstnaren ikkje er etablert enno.
Har de aldersgrense for kva som er ung kunst?
– Nei, vi stiller ut kunst også frå dei som er godt vaksne, berre dei oppfyller kriteriet om at dei ikkje er etablerte. Det er mange som berre har det som
hobby, men som ynskjer å ta kunsten eit steg vidare, seier Tørlen.
Leve av kunsten
Sjølv kjenner ho på at det ikkje er enkelt å vere kunstnar.
– Det skal gå an å leve av kunsten, men det krevst hard jobbing. Dagane vert lange og du er kunstnar på heiltid, seier Tørlen.