Fortuna kan bli AaFK Fortuna
Kvinnefotballaget Fortuna i Aalesund kan kome til å bli AaFK Fortuna frå neste sesong. Aalesunds fotballklubb og Fortuna har forhandla fram ein treårig samarbeidsavtale som skal opp til behandling på ekstraordinære årsmøte om kort tid, skriv Sunnmørsposten. Avtalen inneber mellom anna at kvinnelaget skal spele i oransje drakter frå neste sesong. Nokre kampar kan bli spelt på Color Line Stadion, men etter planen skal Aksla stadion framleis vere fast hovudarena for kvinnelaget.
