I fjor var forureininga i Geiranger på enkelte dagar verre enn i Oslo på grunn av forureinande skip. No blir det slutt på dette, seier miljøvernminister Erik Solheim.
- Det er ein stor siger både for Noreg og
kysten og miljøet. Båtane som går inn til dømes Geirangerfjorden vil gradvis sleppe ut mindre forureining, og fjorden vil ikkje bli hylla inn i røyk. Fram mot 2020 skal problemet vere vekke, seier Solheim.
Tungolje gir forureining
Under høgsesongen i Geiranger kan forureininga vere like ille som i europeiske storbyar. Årsaka er gamle turistskip som går på tungolje av dårleg kvalitet.
I år er det venta 177 skip til Geiranger. Det er ny rekord. Det nye regelverket gjer at norske styresmakter kan nekte cruiseskip som forureinar i å seile i norske fjordar.
- Når reglane er på plass vil Noreg ha full adgang til å avvise dei. Og dei vil også bli avvist i andre hamner rundt om i verda. I praksis vil det seie at dei vil forsvinne, seier Solheim.
Reduserer skadeomfanget
Dei nye reglane set strenge krav til utslepp av svoveldioksid (SO2) og nitrogenoksider NOx. Med dei nye krava vil også skadane etter eit eventuelt forlis bli dramatisk redusert.
- Det skaper tryggheit for folk langs kysten. Båtar som eventuelt går på grunn vil ikkje sleppe ut tungolje som vil øydelegge fisk og fugl i lang tid, seier miljøvernministeren.
Nøgd ordførar
Ordførar i Stranda, Frank Sve, har ikkje noko i mot å nekte dei verste miljøsyndarane å seile i Geirangerfjorden.
- Det er ingen stor nedtur at vi kan bli kvitt dei verste skipa. Det blir ikkje eit stort sakn, seier Sve.