Ferje sleit seg og slo hol i veggen på butikk

Ei ferje sleit seg i indre hamn ved Skutvikpiren i Ålesund tidleg onsdag morgon.

Ein taubåt kom raskt til då ferja sleit seg. Den blei liggande på utsida av ferja for å hindre at den dreiv ut av hamnebassenget.

Det var ei reserveferje som sleit seg.

Taubåten ligg framleis på staden for å halde ferja på plass og for å overvake situasjonen. I tillegg er redningsskøyta på plass for å hjelpe til.

– Ferja trefte ein annan båt som låg ved kai og trefte så butikken der det blei eit hol på rundt to gonge to meter, seier Ewa Welle, innsatsleiar i Møre og Romsdal politidistrikt.

Ho fortel at ingen personar skal ha blitt skadd i hendinga. Skadeomfanget på ferja og båten er uklart. Welle seier vidare at dei har beredskap utover dagen og natta i samband med vêrsituasjonen.

Fjord1 opplyser til NRK at ferja skal ha fått mindre skader. Den må på verkstad for å få utbetra desse.

Mannskapet om bord i redningsskøyta Idar Ulstein opplyser til NRK at dei passar på ferja til det kjem nye fortøyingar.

– Det kjem nokre vindkast som er ganske kraftige, seier Tom Kausanrød om bord i redningsskøyta til NRK onsdag morgon.

Skader på veggen

Det var ein Kiwi-butikk i Nedre Strandgate i Ålesund som blei skadd då ferja sleit seg i morgontimane. Dei har no eit stort hol i veggen.

Butikksjef Marie Valderhaug seier ho fekk melding om skaden i 06.00-tida.

– Det er berre litt øl som har gått med, så det kunne gått mykje verre. Butikken var heldigvis stengt, så det var ingen her då det skjedde.

Arbeidet med å reparere holet i veggen har allereie starta onsdag morgon. Butikken er open medan arbeidet skjer.

– Det er berre det området der det er hol i veggen som vi har stengt av, seier Valderhaug.

Straumbrot fleire plassar

Vêrforholda førte også til straumbrot fleire stadar i Møre og Romsdal.

På eit tidspunkt var 23.000 kundar på Søre Sunnmøre utan straum, ifølge nettselskapet Linja.

I 09.00-tida har alle fått straumen tilbake.

Rune Kiperberg, administrerande direktør i Linja, seier at utfallet skuldast vêret.

– Årsaka var at Statnett fekk problem med forsyninga frå 420-kilowattsnettet og inn til Ørsta og Volda. Dårleg vêr og sterk vind slo ut sentralnettet til Statnett.

Han seier vidare at dei er førebudde på at det kan kome nye straumbrot i løpet av dagen.

– Forsyninga no er normalisert. Men vi har folk i beredskap og er førebudd på det vêret som er meldt, seier Kiperberg.

Straumen forsvann igjen i Ørsta og Volda like før klokka 10.00, men alle fekk straumen igjen etter ei stund.

Også i Stranda, Sykkylven og Haugen var folk utan stram ei stund onsdag morgon. Også her skal straumen vere tilbake.

Elinett melde onsdag morgon om eit straumbrot i området Gule – Vikan – Hustad. På det meste var 414 kundar råka av dette straumbrotet. i 10.00-tida skal dei fleste ha fått straumen tilbake.

Hurtigruter ligg til kai

Hurtigrutene MS «Nordkapp» og MS «Trollfjord» ligg til kai i Molde på grunn av vêret. MS «Nordkapp» var på veg nordover, men kunne ikkje legge til kai i Ålesund tidlegare i dag på grunn av vêrforholda, og reiste difor vidare til Molde. Der kjem dei til å ligge til kai til i kveld, før dei tek opp igjen ruta til vanleg tid i kveld, opplyser Hurtigruta.

MS «Trollfjord» skal sørover, men også dei blei hindra frå å legge til i Ålesund tidlegare i dag, og ligg difor i Molde. MS «Trollfjord» går ikkje i passasjerrute og det er difor ingen passasjerar som blir råka av dette, opplyser Hurtigruta.

Innstilte flyavgangar

Vêret onsdag morgon førte også til fleire innstillingar i flytrafikken.

Trøbbel i trafikken

Kraftige kastevindar har også gjort at fleire ferje- og hurtigbåtsamband blei innstilte:

• Hareid – Sulesund var innstilt, men Fjord1 melder om normal drift frå 09.50.
• Solavågen – Festøya. Her blir det normal drift igjen frå klokka 10.00.
• Hurtigbåten mellom Langevåg – Ålesund. Denne var tilbake i ute frå klokka 11.45, med første avgang frå Ålesund.
• Hurtigbåten mellom Hareid – Valderøya – Ålesund var innstilt ei periode, men kom tilbake i rute i 09.40-tida.
• Hurtigbåten mellom Trondheim – Kristiansund var innstilt. Det har også vore enkelte forseinkingar på grunn av vêret. Torghatten Midt ber alle reisande om å møte til den tida som står på rutetabellen.
• Tresfjordbrua var stengt på grunn av sterk vind, men opna igjen like før klokka 11.00.
• Brattvåg – Dryna var innstilt inntil vidare på grunn av vêrforholda. Også den er tilbake i drift i 10.00-tida.
• Aursnes – Magerholm var innstilt, men der blir det normal trafikk frå 09.30, ifølge Fjord1.