Klokka 04.09 fekk politiet melding om røykutvikling i ei blokkleilegheit i Ålesund by.
Brannvesenet fekk avgrensa brannen til den eine leilegheita, der ei 89 år gamal kvinne budde åleine. Den ligg i første etasje.
– Kvinna er stadfesta omkomen og dei pårørande er varsla, seier operasjonsleiar John Bratland i Møre og Romsdal politidistrikt.
Brannen var sløkt klokka 04.31, og litt før fem var heile bygget søkt gjennom.
– Det var litt røyk som blei merkt i andre leilegheiter, men ingen andre fekk skadar, seier Bratland.
Kriminalteknikarar er på staden for å gjere undersøkingar. Politiet vil førebels ikkje seie noko om brannårsaka.