Om lag 1.200 tilsette ved Ekornes sine produksjonsanlegg på Grodås i Sogn og Fjordane, på Hareid og ved tre anlegg i Sykkylven, vil bli ramma.
Ekornes frykta tidlegare i sommar for at tilsette måtte permiterast.
- Les også: Mørke utsikter for Ekornes
– Ordrereserven lavare enn forventa
Det var ein svikt i ordrereserven som gav utslaget.
– Like før sommarferien informerte vi i leiinga dei tilsette og aksjemarknaden om at ordrereserven var lavare enn forventa, og vesentleg lavare i forhold til fjoråret. Den situasjonen har ikkje betra seg i løpet av sommaren, seier konsernsjef i Ekornes, Nils Fredrik Drabløs, og legg til:
– Vi har difor måtte gå til det skrittet å gjennomføre firedagersveke over ei åttevekersperiode frå september til oktober.
Einigheit internt
Ekornes går til det drastiske skrittet for å tilpasse drifta til den løpande ordremassen. Konsernsjefen meiner tiltaket er omstendeleg diskutert innad.
– Det er full einigheit internt om at dette er eit tiltak som passar godt i forhold til situasjonen, og som får minst moglege konsekvensar for dei tilsette, seier Nils Fredrik Drabløs avslutningsvis.
– Alle deler på belastinga
Hovudtillitsvalt for dei tilsette i Ekornes, Asbjørn Sjåstad, meiner firedagarsveke over ei kortare periode er eit greit alternativ, då ein på denne måten unngår permitteringar.
– Det er sjølvsagt ikkje kjekt å måtte redusere arbeidstida til dei tilsette. Men dette er ein fornuftig måte å gjere det på, basert på den historiske ordreinngangen for august og september, seier Sjåstad.
Han poengterer at ingen vil misse jobben sin som følgje av innføringa av firedagarsveker.
– Vi deler alle på belastinga. Dersom vi var nøydde til å permittere, hadde berre eit fåtal måtte kjenne på belastinga åleine, seier Asbjørn Sjåstad.
