Bye er éin av tre fagdirektørar i Kystverket i Ålesund.
Då ho i sommar blei omplassert av Kystdirektør Kirsti Slotsvik, saksøkte ho Kystverket.
– Saksbehandlarliknande stilling
Vigdis T. Bye vil ikkje gå med på det ho meiner er ei usakleg omplassering til anna stilling i Kystverket.
Hennar krav er å få behalde den opphavlege stillinga si.
Advokat Katrine Hellum-Lilleengen grunngjev kravet slik:
– Det går på å omplassere henne i ei saksbehandlarliknande stilling som verken er framforhandla med forbund, eller som eksisterer i dag.
– Den verkar både innhaldslaus og ansvarslaus, og omplasseringa er i strid med tenestelova, seier Hellum-Lilleengen.
Bye har vore éin av tre fagdirektørar under Kirsti Slotsvik i Kystverket i Ålesund. I tillegg har Bye vore konstituert kystdirektør, samstundes som ho har leiing- og personalansvar som oppgåver i sin noverande jobb.
Vil miste ansvar
Det ansvaret vil Bye miste i jobben Kystdirektøren vil ha henne over i.
I den nye jobben vil ho halde på tittel og løn, men jobben skulle mellom anna gå med på å selje unna nedlagde fiskerihamner.
Spørsmålet i retten er altså om Bye skal få halde fram i jobben ho har i dag, eller om ho må godta ei omplassering.
Kjølna forhold
Første dag i retten gjekk mellom anna med på ei utgreiing av Bye si kompetanse og tidlegare yrkesbakgrunn.
I tillegg har vi fått høyre at tillitsforholdet mellom Bye og Kystdirektør Slotsvik har kjølna svært mykje etter at omplasseringsforslaget kom.
Ifølgje Sunnmørsposten rauk dei to partane uklar for om lag eitt år sidan. No vil altså Kystdirektøren omplassere Bye. Kystdirektøren hevdar omplasseringa ligg innanfor den retten arbeidsgjevar har til å omplassere tilsette.
– Bye har haldt på same løn, tittel og andre vilkår. Ho skal framleis rapportere til Kystdirektøren, seier Kystverket sin advokat, Anne Marie Due, til Sunnmørsposten.
Due seier òg at Bye har vore uskikka for jobben i lang tid. Advokat til Bye meiner derimot at Kystverket ikkje har dokumentert nokon sakleg grunn for oppsigelsen.
Saka er venta å ta tre dagar.