Fleire vil bli skipsførar og ferjeselskapa jublar

Det mest populære studiet ved Høgskulen i Ålesund i år er nautikk og det jublar ferjeselskapet Fjord 1 for. Mange stader i landet slit dei med å få nok bemanning på ferjene.

– For oss er det veldig positivt at interessa for dei maritime faga vert større. Studentane er potensielle arbeidstakarar hos oss, seier Kurt Werner Holsæter. Han er rekrutteringsansvarleg i Fjord1.

LES OGSÅ:

• Flere synes at dette er gøy
• Rekordhøye søkertall til høgskolen
• 2035: – For få sykepleiere, for mange psykologer

Skipssimulator

– No er vi på veg inn innseglinga til Singapore. Her er høg tettheit av farty, seier Syver Grepstad, som er inne i ein av skipssimulatorane på Høgskulen i Ålesund.

Grepstad går første året nautikk, og hit har også 200 andre søkt seg til hausten. Men det vert rift om plassane, for skulen har berre plass til 35. I heile landet er det registrert ein auke i talet på studentar. Høgskulen i Ålesund har over 18 prosent auke i forhold til i fjor, alle studium sett under eitt.

Kadett på båt

-Eg føler at utdanninga gjer meg klar til å møte det verkelege livet der eg skal ta del i navigeringa på ein båt, seier Grepstad.

Til sommaren reknar han med å vere kadett på ein supplybåt i Nordsjøen.

Godt studentmiljø

Også Christian Remøy går nautikk, og han meiner at grunnen til at skulen har så mange søkjarar både handlar om kvalitet og eit godt studentmiljø.

– Det er eit spanande studiemiljø i Ålesund. Det er mange gode fritidsaktivitetar med alle fjell og fjordar. Det trur eg betyr mykje, seier Remøy. Han er ferdig med skulen til våren og skal ut på sjøen og samle nok fartstid for å få sertifikat.

Han trur kvaliteten på skipperane vert betre, sidan det er rift om plassane.

God tilgang på sommarjobb

Studieleiar ved Høgskulen i Ålesund, Stig Arne Skjerven, trur det store søkjartalet gjer at dei får inn meir motiverte studentar. Nautikkutdanninga har hatt eit aukande søkjartal kvart einaste år.

– Vi har verdas beste skipssimulatorar på skulen, og studentane har god tilgang til kadettplassar om sommaren. Det er nok ein av grunnane til at studentane vil hit, seier Skjerven.

Attraktivt på ferje

I ferjeselskapet Fjord 1 gler dei seg til at nokre av studentane truleg vil jobbe på ferje.

– Det har skjedd store endringar på båtane dei siste åra. Ferjene er større, meir moderne og har meir teknologi, og det gjer at det er meir attraktivt å jobbe på ferje, seier Holsæter.